სერგი კაპანაძე - იმ განცხადებით, რომელიც თეა წულუკიანმა ხორავას ქუჩის საქმეზე პარლამენტის საგამოძიებო კომისიასთან დაკავშირებით გააკეთა, კიდევ ერთხელ დაადასტურა, რომ მას თანამდებობა არ უნდა ეკავოს

იმ განცხადებით, რომელიც იუსტიციის მინისტრმა თეა წულუკიანმა ხორავას ქუჩის საქმეზე პარლამენტის საგამოძიებო კომისიასთან დაკავშირებით გააკეთა, კიდევ ერთხელ დაადასტურა, რომ მას იუსტიციის მინისტრის თანამდებობა არ უნდა ეკავოს და ამ მიმართულებით საგამოძიებო კომისიის რეკომენდაცია არის სწორი და სამართლიანი, - ასე გამოეხმაურა კომისიის თავმჯდომარე სერგი კაპანაძე თეა წულუკიანის შეფასებებს.

კაპანაძემ იუსტიციის მინისტრის განცხადებას დღეს სპეციალური ბრიფინგზე უპასუხა, სადაც მთავრობას მიმართა, რომ კომისიის დასკვნით დამტკიცებული ყველა რეკომედაცია შეასრულოს, მათ შორის იუსტიციის მინისტრის პოლიტიკური პასუხისმგებლობის დაყენებაზე.

“თეა წულუკიანი, ყოვლად სამარცხვინოდ, პარლამენტის საგამოძიებო კომისიას ევროკონვენციის დარღვევაში ადანაშაულებს. იმის ნაცვლად, რომ იუსტიციის მინისტრი იყოს სამართლიანობის გულშემატკივარი, გულშემატკივრობდეს იმ ადამიანების დასჯას, ვინც ხელი დააფარეს მკვლელებს, ნაცვლად იმისა, რომ გულშემატკივრობდეს დაზარალებულ მხარეს და დაინტერესებული იყოს მათი ბედით, ის ამ ტრაგედიას იყენებს იმისთვის, რომ თავს დაესხას პოლიტიკურ ოპონენტებს. მინისტრი სრულიად უტიფრად აცხადებს, რომ თურმე “ევროპული საქართველო“ დაინტერესებული ყოფილა სრულიად უდანაშაულო ადამიანების დასჯით და ამ ყველაფერს ევროკონვენციის დარღვევით აკეთებს“, - განაცხადა სერგი კაპანაძემ.

კაპანაძემ ხაზგასმით აღნიშნა, რომ პარლამენტის საგამოძიებო კომისიამ ძალიან ბევრი დარღვევა გამოავლინა, რაც პირდაპირ მიუთითებს, რომ საგამოძიებო უწყებები მირზა სუბელიანის ნათესავებს ხელს აფარებდნენ. კაპანაძის თქმით, შესაბამისი ფაქტები კომისიის მიერ უტყუარად არის დადგენილი.

“ჩვენ ამის გამო გავეცით რეკომენდაციები, რომ ყველა ეს ადამიანი, ვინც ამაში შემჩნეულია, მათ შორის ირაკლი შოთაძე, რომელიც თეა წულუკიანის ფავორიტი იყო და ბოლო წამამდე კბილებით იცავდა, მათ მიმართ დაიწყოს გამოძიება. თავად წულუკიანის მიმართ გავეცით კონკრეტული რეკომენდაცია, რომ დადგეს მისი პოლიტიკური პასუხისმგებლობის საკითხი, რადგან მან, როგორც იუსტიციის მინისტრმა, შეარჩია მთავარი პროკურორი და მას ბოლო წამამდე გულშემატკივრობდა“, - განაცხადა კაპანაძემ დღეს გამართულ ბრიფინგზე.

ზაზა ფირალიშვილი - უბრალოდ, ივანიშვილს  ვერ წარმოუდგენია, რომ თავადაც ძველი ხელისუფლების მსგავსი შეცდომები მოსდის
ქართული პრესის მიმოხილვა 18.11.2019
ხათუნა ლაგაზიძე -  პარლამენტში მიმდინარე პროცესები იმის ტესტიც არის, თუ რად უღირს თანამედროვე დასავლურ პოლიტიკურ ელიტას საქართველო