ჩვენი მხარდაჭერის გარეშე მეეჭვება ვინმეს ჰქონდეს გამარჯვების დიდი შანსი, თუმცა მას აქვს თავისი ხიბლი, რომლითაც სერიოზულ წინააღმდეგობას გაუწევდა სხვას, - აცხადებს საპარლამენტო უმრავლესობის წევრი ნუკრი ქანთარია "ქართული ოცნების" მიერ სალომე ზურაბიშვილის კანდიდატურის მხარდაჭერასთან დაკავშირებით.
ქანთარიას თქმით, მმართველმა გუნდმა სწორი გადაწყვეტილება მიიღო, რომ მხარს სალომე ზურაბიშვილს უჭერს.
"ვფიქრობ, პოლიტსაბჭოზე ადეკვატური გადაწყვეტილება მიიღეს. ეს საკითხი ადრეც იდგა და აღმოჩენა არ იყო, რომ ზურაბიშვილის მხარდაჭერა გადავწყვიტეთ. მე მასში მომწონს, რომ მას აქვს შთამბეჭდავი თავგადასავალი და ის პიროვნულად ძალიან წონიანი დაჯდება ნებისმიერთან, იქნება ეს ტერეზა მეი, მაკრონი თუ სხვები. ის იქნება საკმაოდ საინტერესო პრეზიდენტი“,- აცხადებს ქანთარია.
რაც შეეხება მმართველი პარტიის მიერ ზურაბიშვილისთვის დაფინასების გამოყოფის შესაძლებლობას, ქანთარია ამბობს, რომ გუნდი ყველანაირად ჩართული უნდა იყოს წინასაარჩევნო კამპანიაში.
"ყველანაირად ჩართული უნდა იყოს რაც კანონს არ ეწინააღმდეგება",- აღნიშნა ქანთარიამ.
შეგახსენებთ, რომ "ქართული ოცნება" მხარს საპრეზიდენტო არჩევნებში დამოუკიდებელ კანდიდატს სალომე ზურაბიშვილს უჭერს.