მსოფლიოში ყველაზე სწრაფად მზარდ ტურისტულ მიმართულებებს შორის საქართველოს მე-4 პოზიციას საქართველოს ტურიზმის ასოციაციის ხელმძღვანელი ნატა კვაჭანტირაძე დადებითად აფასებს.

,,გაეროს მსოფლიო ტურიზმის ორგანიზაციის ანგარიშში წარმოდგენილი საქართველოს პოზიცია, როგორც ტურისტულად მზარდი ქვეყნის, მეტად მნიშვნელოვანია ცნობადობის ამაღლების კუთხით, რაც ასევე კიდევ უფრო მეტად გაზრდის ქვეყანაში ვიზიტორთა რაოდენობას.

მისასალმებელია ის ფაქტიც, რომ შავი ზღვის რეგიონში საქართველოს ტურისტული შესაძლებლობები უფრო ყურადსაღები და თვალსაჩინო გახდა, რაზეც უკვე ექსპერტების დაკვირვებაც მეტყველებს. ვიმედოვნებთ, როგორც ზრდის მაჩვენებლებით, ასევე მომსახურების ხარისხის მაღალი შესაძლებლობებითაც მივაღწევთ დიდ წარმატებებს“, აცხადებს ნატა კვაჭანტირაძე.

შეგახსენებთ, რომ გაეროს მსოფლიო ტურიზმის ორგანიზაციამ (UNWTO ) 2017 წლის ტურისტული მიმოხილვა გამოაქვეყნა. ანგარიშში წარმოდგენილია მსოფლიოს სხვადასხვა ქვეყნების, რეგიონების სტატისტიკური მონაცემები, კვლევები, ტენდენციები და აქტივობები, რომელიც ტურიზმს მოიცავს.

აღნიშნულ ინფორმაციას ტურიზმის ეროვნული ადმინისტრაცია ავრცელებს.