არასწორია ოპოზიციის მხრიდან აპელირება, რომ სალომე ზურაბიშვილი არის „ქართული ოცნების" კანდიდატურა, - ამის შესახებ ჟურნალისტებს საპარლამენტო უმრავლესობის წევრმა ირაკლი სესიაშვილმა განუცხადა. მისი თქმით, ძირითადი კრიტერიუმები, რის გამოც „ქართული ოცნება" სალომე ზურაბიშვილს მხარს უჭერს, პრინციპულობა და მიუკერძოებლობაა.

„არ მიმაჩნია სწორად რაიმე კრიტერიუმებით შევაფასო სალომე ზურაბიშვილი, რადგან ამ ადამიანს სხვადასხვა საერთაშორისო ორგანიზაციებში მუშაობის უნიკალური გამოცდილება აქვს. იგი წლების განმავლობაში ძალიან აქტიურად იყო ჩართული ქართულ პოლიტიკურ ცხოვრებაში. მას აქვს თავისი ღირსეული იმიჯი. წარმოდგენილი კანდიდატებიდან ქალბატონ სალომეს მე მხარს დავუჭერ. შესაბამისად, სწორი გადაწყვეტილება მიიღო „ქართულმა ოცნებამ“. ჩვენ არ დავაყენეთ საკუთარი კანდიდატურა და დავეყრდენით იმ პრინციპს, რომ ახალი კონსტიტუციიდან გამომდინარე, ახალი პრეზიდენტი მაქსიმალურად ნეიტრალური უნდა იყოს. არასწორია ოპოზიციის მხრიდან აპელირება, რომ სალომე ზურაბიშვილი არის „ქართული ოცნების" კანდიდატურა. ვინც იცნობს სალომე ზურაბიშვილს, მე მგონი, ეჭვი არავის ეპარება მის პრინციპულობაში, მის მიუკერძოებლობაში და ეს ის ძირითადი კრიტერიუმებია, რის გამოც „ქართული ოცნება" და მეც პირადად მის კანდიდატურას მხარს დავუჭერთ",- განაცხადა სესიაშვილმა.