საქართველოს და „ქართული ოცნების" პოზიცია ნათელია - ჩვენ ვითხოვთ ნატო-ს წარმომადგენლობას საქართველოში, რათა ეს იყოს დემონსტრირება, რომ ჩვენი მოკავშირეები ჩვენთან არიან, - ამის შესახებ საგარეო საქმეთა მინისტრმა, დავით ზალკალიანმა საერთაშორისო კონფერენციაზე, „მსოფლიო თავდაყირა - 2018" მისთვის დასმული კითხვის საპასუხოდ განაცხადა.

„ევროპული საქართველოს" წევრი, გიორგი კანდელაკი დაინტერესდა, თუ როგორ შეაფასებდა დავით ზალკალიანი საპრეზიდენტო კანდიდატის, სალომე ზურაბიშვილის პოზიციას ქართულ-ამერიკულ სამხედრო წვრთნებთან დაკავშირებით, რომ "ამ წვრთნების დანიშნულება არ იცის".

„მე არ ვაპირებ კომენტარზე კომენტარის გაკეთებას, თუმცა საქართველოს და „ქართული ოცნების" პოზიცია არის ნათელი - ჩვენ ვითხოვთ ნატო-ს წარმომადგენლობას საქართველოში, ვინაიდან ეს უნდა იყოს დემონსტრირება, რომ ჩვენი მოკავშირეები არიან საქართველოში. ქართული მხარე მზად არის გააგრძელოს ძალიან აქტიური მოქმედებები ამ პროცესში, რათა უზრუნველყოფილი იყოს ნატო-ს ჩართულობა საქართველოში, მათ შორის წვრთნების თვალსაზრისით", - განაცხადა ზალკალიანმა.