იურიდიული დახმარების სამსახური, საზოგადოებრივი ადვოკატების ნაწილის მიერ გავრცელებულ განცხადებას ეხმაურება

იურიდიული დახმარების სამსახური, საზოგადოებრივი ადვოკატების ნაწილის მიერ დღეს გავრცელებულ განცხადებას ეხმაურება. როგორც იურიდიული დახმარების სამსახურის ოფიციალურ განცხადებაშია ნათქვამი, ადვოკატების პრესკონფერენციაზე გამოთქმული მოსაზრებები რამდენიმე არასწორ ინფორმაციას შეიცავს.

„იურიდიული დახმარების სამსახური, როგორც საბიუჯეტო ორგანიზაცია, ახორციელებს სახელმწიფოს მიერ უფასო სამართლებრივი დახმარების გაწევას მოწყვლადი მოსახლეობისთვის. საქართველოს კანონის „იურიდიული დახმარების შესახებ“ მე–11 და მე–14 მუხლების თანახმად, იურიდიული დახმარების საბჭოს (შემადგენლობა: საქართველოს ადვოკატთა ასოციაციის 3 წევრი, სახალხო დამცველის 3 წარმომადგენელი, 1 წევრი იურიდიული დახმარების ბიუროების ადვოკატებისაგან, 1 წევრი საქართველოს იუსტიციის სამინისტროდან და 1 წევრი იუსტიციის უმაღლესი საბჭოს არამოსამართლე წევრებისაგან ) გადაწყვეტილების საფუძველზე, ორი წლის წინ დაიწყო საპილოტე პროექტი – ბენეფიაციარისათვის ადვოკატის მიერ გაწეული მომსახურების ხარისხის შეფასების სისტემის დანერგვა სისხლის სამართლის საქმეებზე. თუმცა საზოგადოებრივი ადვოკატების საქმიანობის შეფასება სამსახურში ჯერ კიდევ 2009 წლიდან მიმდინარეობდა – ადვოკატებისვე ჩართულობით. შემდგომ ეტაპზე კი განახლდა მუშაობა უფრო დახვეწილი და ყველასათვის მისაღები შეფასების სისტემის ჩამოსაყალიბებლად. ისევე, როგორც სახელმწიფო სერვისის მიმწოდებელი ნებისმიერი ორგანიზაცია, იურიდიული დახმარების სამსახურიც დაინტერესებულია, რომ მის მიერ სოციალურად დაუცველი მოსახლეობისთვის გაწეული მომსახურების ხარისხი იყოს მაღალი. ეს განსაკუთრებით მნიშვნელოვანია მოსახლეობის იმ ნაწილისთვის, რომელსაც არ აქვს საშუალება, მოიწვიოს კერძო ადვოკატი.

რაც შეეხება გაწეული მომსახურების ხარისხის შეფასების სისტემას, ის გულისხმობს ადვოკატების საქმიანობის შეფასებას უკვე დასრულებულ საქმეებზე, რომელთა ბენეფიციარებს აქვთ სრული ინფორმაცია ამის შესახებ და თანახმა არიან, რათა მოხდეს მათი უკვე დასრულებული საქმის შეფასება გაწული მომსახურების ხარისხის შესწავლის მიზნით. ამიტომ აღნიშნული სისტემა არავითარ შემთხვევაში არ ეწინააღმდეგება „ადვოკატთა შესახებ“ საქართველოს კანონს და ადვოკატთა ეთიკის კოდექსს. ასევე არ ეწინააღმდეგება ადამიანის უფლებათა ევროპული კონვენციის მე-6 მუხლს, რაც სამართლიანი სასამართლო განხილვის უფლებას გულისხმობს. პირიქით, „სამართლიანი სასამართლოს“ უფლება გულისხმობს ბენეფიციარის უზრუნველყოფას არა ილუზორული და ფორმალური, არამედ ეფექტიანი და ხარისხიანი დაცვის უფლებით.

მსგავსი სისტემები დანერგილია მსოფლიოს არაერთ უფასო იურიდიული დახმარების სისტემის მქონე ქვეყანაში, ევროპის წამყვან სახელმწიფოებში. საპილოტე პროექტი საქართველოში მომზადდა და მიმდინარეობს გაეროს განივთარების პროგრამის, ევროკავშირის წარმომადგენლობის, აშშ–ს საერთაშორისო განვითრების სააგენტოს და სხვა საერთშორისო ორგანიზაციების მხარდაჭერით. იურიდიული დახმარების სამსახურის ადვოკატების მიერ გაწეული მომსახურების ხარისხის შეფასების კრიტერიუმები და კონცეფცია იურიდიული დახმარების საბჭოს მიერ პილოტურ რეჟიმში ამოქმედდა იმ მიზნით, რომ მომხდარიყო მისი ეფექტიანობის დადგენა ქართულ რეალობაში და პილოტის განხორციელებისას გამოვლენილი ხარვეზების საფუძველზე ადვოკატების ჩართულობით, მოხდეს ზემოაღნიშნულ დოკუმენტებში ცვლილებების შეტანა და შემდგომ მიღება. საგულისხმოა ის ფაქტიც, რომ იურიდიული დამხარების სამსახურის ადვოკატების მიერ გაწეული მომსახურების ხარისხის შეფასების კრიტერიუმები და კონცეფცია შემუშავებულია სამუშაო ჯგუფის მიერ, რომელიც შეიქმნა იურიდიული დახმარების საბჭოს, აპარატისა და 12–ვე ბიუროს მიერ წარმოდგენილი ადვოკატთა, მათ შორის, მოსარჩელეების მონაწილეობით.

დაცვის უფლება გარანტირებულია საქართველოს კონსტიტუციის 42–ე მუხლით და სწორედ ამ მზინით შეიქმნა 2007 წელს სოციალურ მოთხოვნილებეზე ორიენტირებული, მდგრადი და საიმედო სისტემა იურიდიული დახმარების სამსახურის სახით.

ყველაზე მთავარია, მოხდეს სახელმწიფოს მხრიდან ბენეფიციარების უზრუნველყოფა, რაც შეიძლება მაღალი ხარისხის უფასო სამართლებრივი დახმარებით.

სასამართლო ერთ წელზე მეტია განიხილავს სარჩელს, რომელიც იურიდიული დახმარების სამსახურის 16–მა (და არა 22–მა, როგოც კორესპოდენციაშია აღნიშნული) ადვოკატმა აღნიშნული საპილოტე პროექტის წინააღმდეგ შეიტანა. ამ ხნის განმავლობაში სრულად არის დაცული მათი თავისუფლება და პროცესს არ მოუხდენია გავლენა მათ საქმიანობაზე, სამსახურეობრივ ურთიერთობებზე.

ვიმედოვნებთ,რომ პროცესები მომავალშიც წარიმართება ადვოკატებთან აქტიური თანამშრომლობით და საბოლოო შედეგი იქნება საზოგადოებრივი ადვოკატის მიერ გაწული მომსახურების ხარისხის შეფასების ყველაზე ეფექტური სისტემის ჩამოყალიბება“, - ნათქვამია იურიდიული დახმარების სამსახურის განცხადებაში.

შეგახსენებთ, საზოგადოებრივი ადვოკატების ნაწილმა დღეს გაავრცელა ინფორმაცია, რომლის თანახმად, სამსახურის ხელმძღვანელმა პირებმა შეიმუშავეს სტანდარტი, რომლის მიხედვით, საზოგადოებრივ ადვოკატებს დაეკისრებათ ვალდებულება, მათ მიერ წარმოებული საქმეეების შინაარსის შესახებ წერილობითი ანგარიში მოამზადონ, რომელსაც უფასო იურიდიული დახმარების სამსახურის ხელმძღვანელ პირებს წარუდგენენ.

ზაზა ფირალიშვილი - უბრალოდ, ივანიშვილს  ვერ წარმოუდგენია, რომ თავადაც ძველი ხელისუფლების მსგავსი შეცდომები მოსდის
ქართული პრესის მიმოხილვა 16.11.2019
ხათუნა ლაგაზიძე -  პარლამენტში მიმდინარე პროცესები იმის ტესტიც არის, თუ რად უღირს თანამედროვე დასავლურ პოლიტიკურ ელიტას საქართველო
ოფისი განახლებულ ჭავჭავაძეზე, ბიზნეს-ცენტრ პიქსელში
საქართველოში მინა-პაკეტის დამზადების ხარისხის კონტროლი ჩატარდა
გამოიძახე ექიმი სახლში - REDMED ინოვაცია ქართულ სამედიცინო სფეროში
#იმოგზაურევისოლთანერთად - საქართველოს დაცულ ტერიტორიებზე მედია-ტური გაიმართა