სპეცოპერაციის შედეგად მოკლული თემირლან მაჩალიკაშვილის მამა მალხაზ მაჩალიკაშვილი არ გამორიცხავს, რომ პარლამენტის წინ მიმდინარე აქციაზე დღეს საღამოს კარავი დადგან. როგორც მან ჟურნალისტებს განუცხადა, მათი მთავარი მოთხოვნა უცვლელი რჩება - რომ დაისაჯონ თემირლან მაჩალიკაშვილისა და დავით სარალიძის მკვლელები. მაჩალიკაშვილის განმარტებით, სანამ აღნიშნული მოთხოვნა არ დაკმაყოფილდება, საპროტესტო აქციები არ შეწყდება.
"ჩვენი მხრიდან ულტიმატუმის სახით გაკეთებილი განცხადებიდან ცხრა საათი იწურება. ხელისუფლებისგან რეაგირება არ არის და სიმართლე გითხრათ, არც ველოდებით. აქ 3 ათასი კი არა, 50 ათასი ადამიანიც რომ იდგეს, ეცდებიან, თავიანთი გაიტანონ. რაც შეეხება აქციებს, მე და ზაზა აქ ვიდგებით, სანამ სიმართლე არ დამტკიცდება. ვითარება ასეთია - ველოდებით აშშ-დან და ევროპიდან ადამინებს, რომლებიც უნდა ჩამოვიდნენ. მათი ჩამოსვლის მერე ვიმოქმედებთ, ვინაიდან გვაქვს ჩვენი გეგმები. მანამდე კი ჩვენ, მე და ბატონი ზაზა გავაგრძელებთ საპროტესტო აქციებს და ვიქნებით აქ, სანამ არ აღიარებენ თემირლანის უდანაშაულობას და სანამ არ დაისჯებიან სარალიძის საქმეზე დასასჯელი პირები", - აღნიშნა მაჩალიკაშვილმა.