საპარლამენტო უმრავლესობის წარმომადგენელს ზაქარია ქუცნაშვილს მარიხუანას წარმოების შესახებ კანონპროექტის ავტორებთან ოთხი მთავარი შეკითხვა ექნება.
როგორც საპატრიარქოს ქართულ უნივერსიტეტში ზაქარია ქუცნაშვილმა ჟურნალისტებს განუცხადა, იგი ოთხ მთავარ შეკითხვას დასვამს კანონპროექტის ავტორებთან, შეიძლება თუ არა მარიხუანას წარმოება საქართველოში სამართლებრივი, ეკონომიკური, სამედიცინო და მორალური თვალსაზრისით. მან მიმართა მედიას, ნუ წარმოაჩენს საკითხს ისე, თითქოს გადაწყვეტილია და ცნობილია მარიხუანას ვინ გაყიდის.
„ნუ ცდილობთ ისე წარმოაჩინოთ საკითხი, რომ უკვე გადაწყვეტილია, გასულია ფინიშში. ჯერ საწყის ეტაპზე ვართ, ვსვამთ შეკითხვებს. როგორც კანონმდებელს და ხალხის წარმომადგენელს, მჭირდება ოთხ შეკითხვაზე პასუხი, რათა გადაწყვეტილების მიღებისას ვიყო თავისუფალი და თამამი. თუ საზოგადოების რომელიმე წევრს კიდევ აქვს მეხუთე და მეექვსე შეკითხვა, ამასაც სიამოვნებით მოვისმენთ. საკითხი არ არის მარტივი და ნუ ვიწყებთ მსჯელობას ბოლოდან - ვინ გაყიდის? ჯერ დავიწყოთ, საერთოდ შეიძლება თუ არა ამ საქმის წარმოება სამართლებრივი, ეკონომიკური, სამედიცინო, მორალური თვალსაზრისით. ამ შეკითხვებს უნდა გავცეთ პასუხი და მერე ვიფიქროთ იმაზე, თუ დადებითი პასუხები არსებობს ამ შეკითხვებზე, ვინ და როგორ განახორციელებს ამ საკითხებს“, - განაცხადა ზაქარია ქუცნაშვილმა.
მისივე თქმით, „თუ მარიხუანას წარმოება ქვეყანას არც ეკონომიკურ სარგებელს მოუტანს, სამედიცინო თვალსაზრისით არ შეიძლება, კრიმინალურ მდგომარეობას გააუარესებს და ამორალურ გარემოს წაახალისებს, ამ შემთხვევაში, რა თქმა უნდა, გადაწყვეტილება ზედაპირზევე ნათელია“.