განათლებისა და მეცნიერების მინისტრის მოადგილის, მიხეილ გიორგაძის განცხადებით, განათლების სამინისტრო ორიენტირებულია ეფექტური მართვის სტრუქტურის შექმნაზე, რის გამოც სამინისტროში საკადრო ცვლილებები განხორციელდა.

გიორგაძეს არ დაუკონკრეტებია, რა გახდა უწყებიდან მინისტრის მოადგილეების თანამდებობიდან გათავისუფლების მიზეზი, თუმცა აღნიშნა, რომ „სისტემის დახვეწისთვის მუდმივად უნდა ვიზრუნოთ“.

„მინისტრმა საკადრო ცვლილებების მიზეზთან დაკავშირებით ისაუბრა. მე განსხვავებულს ვერაფერს დავამატებ, უბრალოდ, კიდევ ერთხელ აღვნიშნავ, რომ ჩვენ ორიენტირებულები ვართ ეფექტური მართვის სტრუქტურის შექმნაზე. რამდენიმე დღეში, განათლების ნაწილში ახალი სტრატეგია და რეფორმა იქნება წარმოდგენილი, სადაც საზოგადოება ახალი მიდგომებისა და ინიციატივების შესახებ შეიტყობს. სწორედ ამ ამბის გათვალისწინებით იყო საკადრო ცვლილებების შესახებ გადაწყვეტილება მიღებული“, - განაცხადა გიორგაძემ.