თუ ამ განცხადებებს, რომელსაც აკეთებს სალომე ზურაბიშვილი, გაიმეორებს როგორც საქართველოს პრეზიდენტი, ეს ჩაითვლება ჩვენს ხარაკირად საერთაშორისო არენაზე, - ამის შესახებ „ინტერპრესნიუსს“ იუსტიციის საბჭოს წევრმა ანა დოლიძემ, პრეზიდენტობის კანდიდატის სალომე ზურაბიშვილის განცხადების შეფასებისას განუცხადა. დოლიძის თქმით, მსგავსი განცხადებები პირდაპირ დარტყმას აყენებს იმ სამართლებრივ პროცესებს, რომელიც ჰააგასა და სტრასბურგში, რუსული აგრესიის დასამტკიცებლად მიმდინარეობს.

„10 წელზე მეტია უამრავი ხალხი მუშაობს საერთაშორისო სასამართლოებში, ჰააგასა და სტრასბურგში, მიმდინარეობს ასევე პროცესები, რომ მოხდეს ქართული მოსახლეობის ინტერესების დაცვა და რუსული აგრესიის დაგმობა. თუ ამ განცხადებებს, რომელსაც აკეთებს სალომე ზურაბიშვილი, გაიმეორებს როგორც საქართველოს პრეზიდენტი, ეს ჩაითვლება ჩვენს ხარაკირად საერთაშორისო არენაზე. ეს უდიდეს დარტყმას მიაყენებს ჩვენს სამართალწარმოებას ჰააგაში და სტრასბურგში, ამიტომ ამის დაშვება არ შეიძლება. დიდი შანსია, რომ ეს საქმეები წავაგოთ. როდესაც პრეზიდენტი ამას გაიმეორებს, ეს იქნება თვითმკვლელობის მცდელობა, მთელი ჩვენი სამართლებრივი პროცესების, რაზეც ამდენი ხანია ვიღწვით, რათა დადგინდეს რუსული აგრესია“, - განაცხადა ანა დოლიძემ.

შეგახსენებთ, რომ სალომე ზურაბიშვილმა აგვისტოს ომთან დაკავშირებით დასმულ კითხვაზე განაცხადა, რომ „ჩვენ დავბომბეთ ჩვენი მოსახლეობა, რისი უფლებაც არც ერთ პრეზიდენტს არ გააჩნია“.