ახლა დასავლეთში გამოიღვიძეს და ხვდებიან, რომ რუსეთი საფრთხეა. სამწუხაროა, რომ ვერ გამოვიღვიძეთ 2008 წლის რუსეთ-საქართველოს ომის შემდეგ, - ამის შესახებ აშშ-ს სახელმწიფო მდივნის მოადგილემ ევრაზიის საკითხებში უეს მიტჩელმა მაკკეინის ინსტიტუტის მიერ ორგანიზებულ თბილისის საერთაშორისო კონფერენციაზე განაცხადა. უეს მიტჩელმა რუსეთიდან მომდინარე საფრთხეებსა და ცივილიზებული სამყაროს მზაობაზე ისაუბრა.

"ადრე ამბობდნენ, რომ რუსეთი საფრთხეს არ წარმოადგენს. ახლა დასავლეთში გამოიღვიძეს და ამბობენ, რომ კი, რუსეთი სერიოზული საფრთხეა. სამწუხაროა, რომ ჩვენ რუსეთ- საქართველოს ომის შემდეგაც ვერ გამოვიღვიძეთ. ეს კი გახდა უკრაინაში ომის დაწყების წინაპირობა. დასავლეთმა გამოიღვიძა და მათ უკვე იციან, რომ რუსეთი სერიოზულად თამაშობს. არგუმენტი, რომ რუსეთი სუსტია, უნდა დავემშვიდობოთ. ასევე უნდა დავემშვიდობოთ იდეას, რომ რუსეთში ეკონომიკური სტაგნაცია რუსეთს ასუსტებს. პუტინი საფრთხეა და იგი ახორციელებს აგრესიას" , - განაცხადა უეს მიტჩელმა.