მამუკა ბახტაძე ისრაელის თავდაცვის მინისტრს შეხვდა

საქართველოს პრემიერ-მინისტრი მამუკა ბახტაძე ისრაელის თავდაცვის მინისტრ ავიგდორ ლიბერმანს შეხვდა, რომელიც საქართველოში ოფიციალური ვიზიტით იმყოფება.როგორც „ინტერპრესნიუსს“ საქართველოს მთავრობის ადმინისტრაციიდან აცნობეს, შეხვედრაზე ორმხრივი თანამშრომლობის გაღრმავებისა და სამომავლო ურთიერთობების პერსპექტივებზე ისაუბრეს. ყურადღება გამახვილდა საქართველოსა და ისრაელს შორის თავდაცვის სფეროში კავშირების კიდევ უფრო გააქტიურების საკითხზე. კერძოდ, საუბარი შეეხო რეზერვის სისტემის განვითარებას, კიბერუსაფრთხოების სფეროში გამოცდილების გაზიარებასა და ტერორიზმთან ბრძოლის მიმართულებით ორ ქვეყანას შორის თანამშრომლობას.

შეხვედრაზე ხაზი გაესვა ისრაელისა და საქართველოს მრავალსაუკუნოვან მეგობრულ ურთიერთობებს. აღინიშნა, რომ ბოლო წლების განმავლობაში ისრაელიდან ტურიზმისა და ინვესტიციების კუთხით საქართველოს მიმართ ინტერესი კიდევ უფრო მზარდი ხდება. ხაზი გაესვა ბათუმსა და თბილისში უძრავი ქონების და ტურიზმის სფეროში ისრაელიდან განხორციელებულ მსხვილ ინვესტიციებს.

გარდა ამისა, შეხვედრაზე საუბარი შეეხო საქართველოსა და ისრაელს შორის თავისუფალი ვაჭრობის შესაძლებლობის განხილვას. როგორც მამუკა ბახტაძემ აღნიშნა, ეკონომიკის სამინისტროს უკვე დაევალა შესაბამისი კვლევის ჩატარება აღნიშნულ საკითხთან დაკავშირებით.

საქართველოს პრემიერ-მინისტრსა და ისრაელის თავდაცვის მინისტრის შეხვედრა მთავრობის ადმინისტრაციაში გაიმართა. შეხვედრას თავდაცვის მინისტრი ლევან იზორია და საგარეო საქმეთა მინისტრი დავით ზალკალიანი ესწრებოდნენ.

თორნიკე ჯანაშვილი - ქვეყანა ღრმა ეკონომიკურ კრიზისშია  და მომავალ წელს უფრო მძიმე  კრიზისის  წინაშე  შეიძლება აღმოვჩნდეთ
ვიქტორ ყიფიანი - როგორიც არ უნდა იყოს რეგიონალური თუ საერთაშორისო კონიუქტურა, რისკების ასაცილებლად და შესაძლებლობების გამოსაყენებლად გზები დამოუკიდებლად უნდა ვეძებოთ
ქართული პრესის მიმოხილვა 10.08.2020
სევრის ხელშეკრულების 100 წლისთავი
სილქნეტის სამთვიანი აქცია უფასო ინსტალაციაზე ამოქმედდა