თურქეთის პრეზიდენტის რეჯებ თაიპ ერდოღანის განცხადებით, სომხეთთან საზღვრის გახსნა და დიპლომატიური ურთიერთობების აღდგენა შეუძლებელი იქნება მთიანი ყარაბაღის კონფლიქტის გადაწყვეტის გარეშე.
„კონფლიქტის დარეგულირებისა და დევნილთა საკუთარ სახლებში დაბრუნების გარეშე, საზღვრის გახსნასა და რაიმე სახის ურთიერთობის დამყარებაზე საუბარიც კი არ შეიძლება იყოს“, - განაცხადა ერდოღანმა აზერბაიჯანში სამხედრო აღლუმზე გამოსვლისას.
სომხეთ-თურქეთის ურთიერთობათა ნორმალიზების პროცესი სომხეთის იმჟამინდელი პრეზიდენტის სეჟ სარგსიანის ინიციატივით, 2008 წლის შემოდგომაზე დაიწყო. 2009 წლის ოქტომბერში ორი ქვეყნის საგარეო საქმეთა მინისტრებმა ციურიხში ხელი მოაწერეს შეთანხმებას დიპლომატიური ურთიერთობების აღდგენის შესახებ, რომელიც ორივე ქვეყნის პარლამენტებისგან რატიფიცირებას ითხოვდა. თუმცა, 2009 წლის დეკემბერში თურქეთის მაშინდელმა პრემიერ-მინისტრმა რეჯებ ტაიპ ერდოღანმა განაცხადა, რომ ანკარა ოქმების რატიფიცირებას მანამდე არ განახორციელებს, ვიდრე ყარაბაღის კონფლიქტი არ გადაწყდება.