თბილისის საკრებულოსთან შეკრებილმა სასულიერო პირებმა მრევლს კვირას, სამების ტაძარში მისვლისკენ მოუწოდეს. როგორც მამა შალვა კეკელიამ თბილისის საკრებულოსთან პარაკლისის გადახდის შემდეგ განაცხადა, უწმინდესის სურვილია, რომ შეიკრიბონ სამების ტაძარში და დაესწრონ ღვთისმსახურებას.

სამების ტაძარში ღვთისმსახურება, კვირას, 10.00 საათიდან დაიწყება.

საკრებულოსთან შეკრებილმა სასულიერო პირებმა კანაფის წარმოებასა და ექსპორტის შესახებ კანონპროექტი გააპროტესტეს და განაცხადეს, რომ თბილისის სამღვდელოება დღეს შეიკრიბა და გადაწყვიტა განცხადება გაეკეთებინა.

„ჩვენ მრევლის პოზიციას გამოვხატავთ. მრევლმა გვაიძულა გამოვსულიყავით აქ. მრევლი გვეუბნება, რას ვაკეთებთ, როგორ შეიძლება ეს აღმოვფხვრათ. დღეს ამას დააკანონებენ, ხვალ და ზეგ სხვა უზნეობებს. ამისთვის არასდროს იქნება ქვეყანა მზად. ჩვენ ვართ ღვთისმშობლის წილხვედრი ქვეყანა“, – განაცხადა მამა შალვა კეკელიამ.