საქართველოს პრეზიდენტობის დამოუკიდებელი კანდიდატი სალომე ზურაბიშვილი ადიგენში ადგილობრივ მოსახლეობას შეხვდა.
მისი პრესსამსახურის ინფორმაციით, ზურაბიშვილმა ისაუბრა ქვეყნისთვის სახელმწიფო მოღვაწის მნიშვნელობაზე.
„როდესაც საგარეო საქმეთა მინისტრი გავხდი, ჟურნალისტებს კარგად არ ესმოდათ, რას ვგულისხმობდი, როცა ვამბობდი, რომ მე პოლიტიკოსი არ ვიყავი. ამის გამო ხშირად ვიღებდი შენიშვნას, - არ შეიძლება, მინისტრი პოლიტიკოსი არ იყოსო.
საგარეო საქმეთა მინისტრი ეკუთვნის არა რომელიმე პარტიას, არამედ სახელმწიფოს. ზუსტად ასევე, არ შეიძლება, პრეზიდენტი იყოს ქვეყნის რაღაც ნაწილის პრეზიდენტი. იგი უნდა იყოს ყველა მოქალაქის პრეზიდენტი, სახელმწიფო მოღვაწე.
როდესაც მე ვიქნები არჩეული პრეზიდენტად, ვიქნები იმ ადამიანების პრეზიდენტიც, რომლებიც დღეს მლანძღავენ. მათგან ყველაზე მეტად მიკვირს სიტყვა „მოღალატე“, რადგან ეს ცნება მორალთან არის დაკავშირებული. მე არ მივცემ თავს უფლებას, ვიღაცებს მოღალატე ვუწოდო. არ შეიძლება, ქართველი მოღალატე იყოს. ეს ჩვენი გენეტიკის ნაწილი არ არის“, - განაცხადა ზურაბიშვილმა.