არგენტინელმა მოსამართლემ ხულიან ერკოლინიმ სენატორისა და ყოფილი პრეზიდენტის კრისტინა ფერნანდეს დე კირშნერის წინააღმდეგ ფულის გათეთრების მუხლით სისხლის სამართლის საქმის აღძვრა გადაწყვიტა. ამის შესახებ სასამართლო წრეებში საკუთარ წყაროებზე დაყრდნობით სააგენტო EFE წერს.
მისი გადაწყვეტილებაა, ბიუჯეტიდან მითვისებული ფულის გათეთრების გამო პასუხისგებაში უნდა მიეცეს 20 ადამიანი, მათ შორის ყოფილი პრეზიდენტი, მისი ვაჟი მაქსიმო, ქალიშვილი ფლორენსია და კირშნერების ოჯახთან დაახლოებული მეწარმე ლასარო ბაესი.
აღსანიშნავია, რომ ბაესი უკვე პატიმრობაში იმყოფება. კრისტინა ფერნანდეს დე კირშნერის მმართველობის დროს ლასარო ბაესის კომპანიებმა სახელმწიფოსთან არაერთი კონტრაქტი გააფორმეს. გამოძიების ვერსიით, ბაესის კომპანიების საშუალებით ფულის გათეთრება მიმდინარეობდა, კრისტინა ფერნანდეს დე კირშნერი და მისი მეუღლე, ყოფილი პრეზიდენტი ნესტორ კირშნერი კი ამით ფინანსურ სარგებელს ნახულობდნენ. ლასარო ბაესი წარდგენილ ბრალდებებს არ ეთანხმება, კრისტინა ფერნანდეს დე კირშნერი კი თავს პოლიტიკური დევნის მსხვერპლად მიიჩნევს.