საქართველოს პარლამენტის საგარეო ურთიერთობათა კომიტეტის თავმჯდომარემ, სოფიო ქაცარავამ ბიშკეკში, ეუთო-ს საპარლამენტო ასამბლეის ფარგლებში, ღია მმართველობის პარტნიორობის ღონისძიებაში მონაწილეობა მიიღო, რომელიც ეუთო-ს დემოკრატიული ინსტიტუტებისა და ადამიანის უფლებების ოფისის (ODIHR) მიერ იყო ორგანიზებული.
როგორც „ინტერპრესნიუსს“ საქართველოს პარლამენტიდან აცნობეს, საგარეო ურთიერთობა კომიტეტის თავმჯდომარემ ამ კონტექსტში საქართველოს პარლამენტის პროგრესზე, განხორციელებული რეფორმებისა და სამოქმედო გეგმის მთავარი პრიორიტეტების შესახებ ისაუბრა.
„ღია მმართველობის პარტნიორობის ფარგლებში საქართველოს მიღწევებს საკანონმდებლო დონეზე, განაპირობებს პოლიტიკური ნება, მჭიდრო და კოორდინირებული თანამშრომლობა საპარლამენტო უმცირესობასთან, ოპოზიციასთან, საერთაშორისო ორგანიზაციებთან და სამოქალაქო საზოგადოებასთან, ასევე თანმიმდევრული მიდგომა პროცესების მიმართ და სტრატეგიული კომუნიკაცია ყველა დაინტერესებულ მხარეს შორის “, - განაცხადა სოფიო ქაცარავამ.