პრეზიდენტად გახდომის დღიდან ნამდვილად არ ვიქნები სავარძელში მჯდომარე, არამედ ვიქნები პრეზიდენტი, რომელიც ჩავა რეგიონებში, მოისმენს პრობლემებს და მოსაზრებებს, - ამის შესახებ საქართველოს პრეზიდენტობის დამოუკიდებელმა კანდიდატმა სალომე ზურაბიშვილმა, რომელსაც მხარს მმართველი პარტია უჭერს, კახეთში, ამომრჩეველთან შეხვედრისას განაცხადა.
როგორც ზურაბიშვილმა აღნიშნა, პარლამენტსა და მთავრობაში ხალხის პრობლემების მიტანას გეგმავს. „კახეთი არის ჩემი რეგიონი, სადაც ძალიან ხშირად ჩამოვდივარ და ბოლოს 10 დღის წინ ვიყავი რთველზე. აქ, როგორც სხვაგან, ტყუილ დაპირებებს არ ვიძლევი, ეს არ არის ჩემი სტილი. მე, ყველა რეგიონში ერთ რამეს ვპირდები, რომ ჩემი პრეზიდენტად გახდომის დღიდან ნამდვილად არ ვიქნები თავის სავარძელში მჯდომარე, არამედ პრეზიდენტი, რომელიც ჩავა რეგიონებში და მოისმენს პრობლემებს და მოსაზრებებს, რომელიც ერთად უნდა გადავწყვიტოთ. მე, ამ მოსაზრებებს მივიტან პარლამენტში თუ მთავრობაში, რომელიც დაგვეხმარება, რომ უფრო სწრაფი სვლით ვიაროთ წინ“, - განაცხადა სალომე ზურაბიშვილმა.