სამხრეთ კორეის სასამართლომ ქვეყნის ყოფილი პრეზიდენტი ლი მიონ ბაკი კორუფციაში და სამსახურებრივი უფლებამოსილების ბოროტად გამოყენებაში დამნაშავედ ცნო და 15 წლით თავისუფლების აღკვეთა მიუსაჯა. ამის შესახებ სააგენტო Yonhap იუწყება.
გარდა ამისა, ბაკს ჯარიმის სახით 11,5 მილიონი დოლარის გადახდა დაეკისრა.
ლი მიონ ბაკი, რომელიც სამხრეთ კორეის პრეზიდენტის პოსტს 2008-2013 წლებში იკავებდა, მიმდინარე წლის 22 მარტს დააკავეს. პროკურატურა მას მექრთამეობას, თანხების მითვისებას, გადასახადების გადახდისგან თავის არიდებას, სამსახურებრივი უფლებამოსილების ბოროტად გამოყენებას და საარჩევნო კანონმდებლობის დარღვევას ედავებოდა, რისთვისაც 20 წლით თავისუფლების აღკვეთას ითხოვდა.
ექს-პრეზიდენტი ყველა ბრალდებას უარყოფდა და ამბობდა, რომ ქვეყნის მოქმედი ხელისუფლება კონსერვატიული ძალების წინააღმდეგ მიზანმიმართულ კამპანიას ატარებს. აღსანიშნავია, რომ ლი მიონ ბაკი გახდა სამხრეთ კორეის რიგით მეხუთე ყოფილი პრეზიდენტი, რომლის წინააღმდეგ სისხლის სამართლის საქმე აღიძრა.