ბრალდების მხარე და გამოძიება ვალდებულია ყველა მტკიცებულება მოიპოვოს კანონის შესაბამისად, რათა აღნიშნული მტკიცებულება შემდგომში არ გახდეს დაუშვებლად ცნობის საფუძველი, - ასე უპასუხა „ომეგა ჯგუფის“ საქმის პროკურორმა გიორგი ოსაძემ ჟურნალისტების კითხვას, შესძლებელია თუ არა, რომ ზაზა ოქუაშვილის დაკითხვა დისტანციურად მოხდეს. მისივე ინფორმაციით, არაერთხელ გაიცა უწყება ოქუაშვილის საგამოძიებო ორგანოში გამოცხადების შესახებ, რაზეც ის უარს აცხადებს.
„ვინაიდან გამოძიების მხრიდან გამოიკვეთა ზაზა ოქუაშვილის დაკითხვის აუცილებლობა, არაერთხელ იქნა გაგზავნილი უწყება მისი საგამოძიებო ორგანოში გამოცხადების შესახებ, თუმცა იგი ამ დრომდე უარს აცხადებს საგამოძიებო ორგანოში მოსვლაზე და აგრეთვე სასამართლოში ჩვენების მიცემაზე. ბრალდების მხარე და გამოძიება ვალდებულია ყველა მტკიცებულება მოიპოვოს კანონის შესაბამისად, რათა აღნიშნული მტკიცებულება შემდგომში არ გახდეს დაუშვებლად ცნობის საფუძველი. მოსამართლის პრეროგატივაა, რას ცნობს დაუშვებლად და რას არა“, - აღნიშნა გიორგი ოსაძემ.