იერუსალიმის სასამართლომ ქვეყნის პრემიერმინისტრის ბენიამინ ნეთანიაჰუს მეუღლის სარა ნეთანიაჰუს საქმის განხილვა დაიწყო. ადგილობრივი მედიის ინფორმაციით, პრემიერის მეუღლე სასამართლოში დღის მეორე ნახევარში გამოცხადდა.
ისრაელის სახელმწიფო რადიოს ცნობით, საქმეს სამი მოსამართლისგან შემდგარი კოლეგია განიხილავს, რადგან პროცესი საზოგადოებრივად მნიშვნელოვან საქმეს ეხება.
მანამდე იერუსალიმის სასამართლომ ბრალი წაუყენა პრემიერის კანცელარიის ყოფილი სამეურნეო ნაწილის უფროსის მოადგილეს ეზრა სეიდოფს, რომელსაც ბრალად ედება თაღლითობა დამამძიმებელ გარემოებებსა და საბუთების გაყალბებაში. გამოცემა „Haaretz“ იუწყება, რომ ბრალდების მიხედვით, სარა ნეთანიაჰუმ და სეოდოფმა კეიტერინგის მომსახურებისთვის 100 ათასი აშშ დოლარი გადაიხადეს. გამოცემის ინფორმაციით, ბრალდება 2010-2013 წლების პერიოდს მოიცავს.
სარა ნეთანიაჰუ პირველად საქმეზე 2016 წელს 10 საათის განმავლობაში იკითხებოდა.