პენიტენციური სამსახურის ინფორმაციით, მირზა სუბელიანს ფსიქოლოგის და ფსიქიატრის დახმარება გაეწია

სპეციალური პენიტენციური სამსახურის ინფორმაციით, მირზა სუბელიანს დღეს დილით ფსიქოლოგმა და ფსიქიატრმა კონსულტაცია გაუწიეს. როგორც სპეციალური პენიტენციური სამსახურის განცხადებაშია ნათქვამი, ბრალდებული იყო და არის სულიერად აღელვებული, მაგრამ ის იმყოფება სამედიცინო პერსონალის ზედამხედველობის ქვეშ და მის სიცოცხლეს საფრთხე არ ემუქრება.

ამასთან, პენიტენციური სამსახური ადასტურებს, რომ გუშინ საღამოს, 2018 წლის 15 ოქტომბერს, ბრალდებულ მირზა სუბელიანის მხრიდან სუიციდის მცდელობას ჰქონდა ადგილი, რაც სასჯელაღსრულების დაწესებულების ადმინისტრაციის მიერ დროულად აღიკვეთა.

„მოცემულ ფაქტზე საქართველოს იუსტიციის სამინისტროს საგამოძიებო დეპარტამენტმა გუშინ საღამოსვე დაიწყო გამოძიება საქართველოს სისხლის სამართლის კოდექსის 115-ე მუხლით. ღამის განმავლობაში პატიმარს გაეწია შესაბამისი სამედიცინო დახმარება, ხოლო დღეს დილით მას კონსულტაცია გაუწიეს ფსიქოლოგმა და ფსიქიატრმა“, - ნათქვამია განცხადებაში.