საპარლამენტო უმცირესობამ ჯერ კიდევ გუშინ მოითხოვა ოფიციალურად პარლამენტში შს მინისტრის და მთავარი პროკურორის მოსვლა. ჩვენ საზოგადოების სახელით უნდა დავსვათ კითხვები და მივიღოთ მასზე პასუხები, - ამის შესახებ „ევროპული საქართველოს“ პრეზიდენტობის კანდიდატმა დავით ბაქრაძემ პარლამენტში შს მინისტრის დაბარებასა და გახმაურებულ ჩანაწერებთან დაკავშირებით განაცხადა.
დავით ბაქრაძის განცხადებით, ეს თემა არის იმდენად საგანგაშო და ყოვლისმომცველი, რომ რა თქმა უნდა, მხოლოდ პარლამენტში მინისტრების მისვლა ამ საკითხს ვერ ამოწურავს.
„საუკეთესო პასუხი არის 28 ოქტომრის არჩევნები, მაგრამ სწორედ იმისთვის, რომ საზოგადოებამ არჩევნებზე გასცეს პასუხი ამ და ბევრ სხვა თემას, აუცილებელია ადამიანების ინფორმირება, კითხვებზე პასუხების გაცემა და ამ თვალსაზრისით მინისტრების და მთავარი პროკურორის მოსვლა პარლამენტში, რა თქმა უნდა, არის მნიშვნელოვანი და აუცილებელი“, – განაცხადა ბაქრაძემ.