მირზა სუბელიანმა განაცხადა, რომ მასზე ზეწოლის განხორციელება შეუძლებელია, - ამის შესახებ სახალხო დამცველმა ნინო ლომჯარიამ ჟურნალისტებს გლდანის მე-8 პენიტენციური დაწესებულებიდან გამოსვლის შემდეგ განუცხადა.
მისი თქმით, სუბელიანს კითხვები გავრცელებულ ჩანაწერებთან დაკავშირებითაც დაუსვა, თუმცა ბრალდებულს ამ თემაზე კომენტარის გაკეთება არ სურს.
ჟურნალისტების შეკითხვაზე, იცოდა, თუ არა მირზა სუბელიანმა, რომ მიმდინარეობდა საუბრის ჩაწერა, რომელიც შემდეგ მედიაში გავრცელდა, სახალხო დამცველმა განაცხადა, რომ კონკრეტულ კითხვებზე პასუხები არ ყოფილა და სუბელიანს არც აქვს სურვილი, რომ ამაზე ომბუდსმენმა საჯაროდ ისაუბროს.