ჩემი პოლიტიკური მხარდაჭერა ამ არჩევნებში ვერც ერთ კანდიდატს ვერ ექნება, რადგან ვერც ერთ მათგანში საზოგადოების გამაერთიანებლის პოტენციალს ვერ ვხედავ, - ამის შესახებ დღეს გამართულ ბრიფინგზე „შენების" პრეზიდენტობის კანდიდატმა დავით უსუფაშვილმა განაცხადა.

მისივე თქმით, მეორე ტურში გასულ კანდიდატების პოლიტიკურ გუნდებს საქართველოს მომავალს ვერ ანდობს.

უსუფაშვილმა კოლეგებს მიმართა, ნუ დაუწესებენ ოპოზიციური საქმიანობის სტანდარტებს. მისივე თქმით, ეს ეხება დავით ბაქრაძეს, რომელმაც განაცხადა, რომ მეორე ტურში მხარს ოპოზიციური საპრეზიდენტო კანდიდატს დაუჭერს.

უსუფაშვილის განცხადებით, ამ ეტაპზე მნიშვნელოვანია ქვეყანაში სახელისუფლებო ცვლილებების განხორციელება, რომელიც კონსტიტუციური გზით უნდა მოხდეს. ასევე საჭიროა, ერთმმართველი „ქართული ოცნება“ ერთმმართველმა „ნაცმოძრაობამ“ არ ჩაანაცვლოს, საითაც პროცესი მიექანება.

„ქვეყანა იმ კრიზისულ სიტუაციას უახლოვდება, სადაც მთელი პოტენციალია ასამოქმედებელი, რათა მრავალპარტიული პარლამენტი მივიღოთ და კოალიციური ხელისუფლება, რომელიც ხალხის მანდატით იქნება აღჭურვილი და ამისკენ ნაბიჯებია გადასადგმელი", - განაცხადა უსუფაშვილმა.

„შენების“ ლიდერმა მადლობა გადაუხადა 36 007 ამომრჩეველს, რომლებმაც მას მისცა ხმა.