"ქართული ოცნების" მაჟორიტარი დეპუტატის სულხან მახათაძის განცხადებით, თუკი მოსახლეობამ ამდენი ხნის განმავლობაში ვერ შეძლო, რომ მათი გადაუჭრელი პრობლემების შესახებ ხმა მიეწვდინა ხელისუფლებისთვის, ასეთი პრობლემები მომავალში აუცილებლად მოგვარდება.

სულხან მახათაძემ "ქართული ოცნების" ოფისში უმრავლესობის წევრებს შორის გამართულ შეხვედრაზე ჟურნალისტებთან ისაუბრა. მისი თქმით, საკმაოდ კომპლექსურია ის საკითხები, თუ სად იყო დაშვებული შეცდომები, თუმცა ისეთი არ არის, რომელიც გამოუსწორებელი იქნება. მახათაძის განმარტებით, მმართველი პარტია ფიქრობს, რომ პრობლემების გამოსწორების შესაძლებლობა და რესურსიც გააჩნია, შესაბამისად, მოსახლეობის ინტერესების დასაცავად ქმედითი ნაბიჯები სწრაფად გადაიდგმება.

"არჩევნების შედეგები, რომელიც მოულოდნელი იყო ჩვენთვის, რეგიონების მიხედვით გავიარეთ, სად გვქონდა ხარვეზები, სად იყო ჩავარდნა და რა გამოწვევას ვერ ვუპასუხეთ, რა იყო ჩვენი მოქალაქეებისა და საზოგადოებისთვის მნიშვნელოვანი, ეს განვიხილეთ. აქედან გამომდინარე დავსახეთ კონკრეტული გზები, რომ მეორე ტურში კიდევ უფრო მეტად გავაქტიურდეთ და მოვახდინოთ ჩვენი გუნდის კონსოლიდაცია, ჩვენი თანაქალაქელების და ზოგადად, ჩვენი საზოგადოების გაერთიანება მოვახდინოთ. აქედან გამომდინარე ჩვენ ყველაფერს გავაკეთებთ იმისთვის, რომ მეორე ტურისთვის დავაჯეროთ ჩვენი მოსახლეობა, რომ ის პრობლემები, რაც მათ აწუხებთ, მათთვის მნიშვნელოვანია, თუკი ამდენი ხნის განმავლობაში შესაძლოა ეს ხმა ვერ მოაწვდინეს ჩვენამდე და შესაბამისად, გადაუჭრელია გარკვეული საკითხები, ასეთი საკითხები აუცილებლად გადაწყდება და გადაიჭრება მომავალში", - განაცხადა მახათაძემ.