რუსეთ-ამერიკის ურთიერთობების ნორმალიზების ტენდენციები ჯერ არ შეიმჩნევა, - ამის შესახებ ჟურნალისტებს რუსეთის პრეზიდენტის პრესმდივანმა დიმიტრი პესკოვმა განუცხადა.
„ვფიქრობთ, რომ არ ღირს თავის მოტყუება და იმედის ქონა, რომ აშშ-ს კონგრესში შუალედური არჩევნები რაიმე გარკვეულობას შეიტანს იმაში, თუ როგორ განვითარდება რუსეთ-ამერიკის ურთიერთობები. ჯერჯერობით ურთიერთობების ნორმალიზების რაიმე ტენდენციები არ შეიმჩნევა“, - განაცხადა დიმიტრი პესკოვმა.
კითხვაზე, ადევნებს თუ არა კრემლი თვალს აშშ-ს კონგრესში შუალედურ არჩევნებს, დიმიტრი პესკოვმა ასე უპასუხა: „შესაბამისი მონაცემების მონიტორინგი მედიასაშუალებით ხდება. ამიტომაც, ასეა თუ ისე, დავაკვირდებით. თუმცა, ვიმეორებ, რომ ეს არჩევნები რაიმე გარკვეულობას ჩვენი ურთიერთობების ნორმალიზებაში არ შეიტანს“.