ვიცით, რა სცენარითაც სურს ძალაუფლების ხელში ჩაგდება ძალადობრივ რეჟიმს - „ნაციონალურ მოძრაობას“. შესაბამისად, ჩვენ ეს არ უნდა დავუშვათ! - ამის შესახებ თბილისის საკრებულოს წევრმა ვახტანგ შაქარიშვილმა რუსთაველის თეატრში განუცხადა, სადაც 2007 წლის 7 ნოემბრის მოვლენებიდან 11 წლისთავთან დაკავშირებით საზოგადოება "მე ვიცავ თავისუფლებას" შეკრებას მართავს.
ვახტანგ შაქარიშვილმა აღნიშნა, რომ დღეს შეკრების მიზეზი და მიზანია საზოგადოებას შეახსენონ „ნაციონალური მოძრაობის“ მმართველობის პერიოდი და აღარ დაუშვან მათი ხელისუფლებაში მობრუნება.
"სხვადასხვა წარსულის და საქმიანობის ადამიანები გავერთიანდით თავისუფლების დასაცავად. ამ მოძრაობის სლოგანია "მე ვიცავ თავისუფლებას". ამ მოძრაობას არ გააჩნია პოლიტიკური კუთვნილება და ერთადერთი მიზანი და ამოცანაა, რომ მოახლოებულ არჩევნებზე საზოგადოების კონსოლიდაცია მოხდეს ბოროტების, ძალადობის და წარსულში დაბრუნების წინააღმდეგ. ასევე დაანონსდება რეგიონალური გასვლები და ეს იქნება ერთგვარი შეხსენება ბოროტების წინააღმდეგ", - განაცხადა ვახტანგ შაქარიშვილმა.