სოფელ ატოცში რუსეთის მიერ მავთულხლართების გაბმა ჩვენი ტერიტორიული სუვერენობის ხელყოფის კიდევ ერთი მაგალითია, - ამის შესახებ „ქართული ოცნების“ მიერ მხარდაჭერილი პრეზიდენტობის კანდიდატი სალომე ზურაბიშვილი „ფეისბუქში“ წერს.

სალომე ზურაბიშვილის თქმით, მოსახლეობის დასაცავად და საოკუპაციო ხაზზე არსებული ვითარების გამოსასწორებლად საქართველომ პარტნიორებთან უფრო მჭიდრო თანამშრომლობა უნდა დაიწყოს.

„სოფელ ატოცში რუსეთის მიერ მავთულხლართების გაბმა არის კიდევ ერთი მაგალითი ჩვენი ტერიტორიული სუვერენობის ხელყოფისა! დასაგმობი და არა მხოლოდ დასაგმობი! ჩვენი მოსახლეობის უსაფრთხოების დასაცავად აუცილებელია, რომ დავიწყოთ ჩვენ პარტნიორებთან უფრო მჭიდრო თანამშრომლობა საოკუპაციო ხაზის საკითხის გამოსასწორებლად.

ამ მიმართულებით პრეზიდენტის ფუნქციაში მოსვლისთანავე შევუდგები მუშაობას ევროკავშირის მონიტორინგის მისიასთან და ამერიკელ პარტნიორებთან”, - წერს სალომე ზურაბიშვილი.

შეგახსენებთ, საოკუპაციო ძალების წარმომადგენლებმა სოფელ ატოცთან საფორტიფიკაციო ნაგებობების მონტაჟი განაახლეს. დღეს დილით, აღნიშნულ ტერიტორიაზე ე.წ. მესაზღვრეებმა სატვირთო ავტომანქანებით მავთულხლართების მონტაჟისთვის საჭირო ლითონის კონსტრუქციები მიიტანეს.