გია ხუხაშვილი - ეკა ბესელიას, როგორც „ძველების“ წარმომადგენლის  სპიკერატში გადანაცვლება შეიძლება საპარლამენტო ძალთა ბალანსში კორექტირების შესატანად ხდებოდეს

ვფიქრობ, ბესელია სპიკერატში შედის, როგორც „ძველების“ წარმომადგენელი ანუ, საპარლამენტო ძალთა ბალანსში კორექტირების შესატანად, - ასე ეხმაურება ექსპერტი გია ხუხაშვილი პარლამენტის იურიდიულ საკითხთა კომიტეტის თავმჯდომარის, ეკა ბესელიას მიერ კომიტეტის თავმჯდომარის პოსტის შესაძლო დატოვებისა და პარლამენტის სპიკერატში გადანაცვლების შესახებ „ინტერპრესნიუსის“ ინფორმაციას.

ხუხაშვილმა „ინტერპრესნიუსთან“ საუბარში აღნიშნა, რომ ე.წ. ძველი გვარდია ხშირ შემთხევაში უკმაყოფილო იყო იმ სისტემით, რომელსაც პარლამენტის თავმჯდომარე ირაკლი კობახიძე ატარებდა და შესაბამისად, საჭირო გახდა სპიკერატში ე.წ. ძველი გვარდიის წარმომადგენლის შესვლა.

„ვფიქრობ, აქ საუბარია უფრო სპიკერატის გაძლიერებაზე. ვიღაცამ შეიძლება ჩათვალა, ამას არ გამოვრიცხავ, რომ პარლამენტში ძალთა თანაფარდობა შეიცვალოს და ახალგაზრდების ჯგუფი, რომლებსაც მთლიანად ჰქონდათ საპარლამენტო ძალაუფლება ხელში მოგდებული და აბსოლუტურად დაუმსახურებლად, ეს ძალთა თანაფარდობა შეიცვალოს. სხვა საკითხია, რამდენად მნიშვნელოვანია ეს სახელმწიფოებრივად. არ მგონია, მნიშვნელოვანი იყოს, უბრალოდ, გარკვეულწილად, პარლამენტის უმრავლესობაში ძალთა ბალანსის შეცვლაზეა საუბარი. ე.წ. ძველები უკმაყოფილოები იყვნენ კობახიძის მიერ დამკვიდრებული აბსოლუტურად გაუგებარი სისტემით და ხშირ შემთხვევაში შეურაცხყოფილადაც კი გრძნობდნენ თავს. ამიტომ, ვფიქრობ, ბესელია სპიკერატში შედის, როგორც ძველების წარმომადგენელი ანუ, საპარლამენტო ძალთა ბალანსში კორექტირების შესატანად. რამდენად სისტემური იქნება ეს ყველაფერი, ამას მომავალი აჩვენებს. ბოლო მოვლენების ფონზე გამოჩნდა, რომ ის ახალგაზრდების ჯგუფი აბსოლუტურად უსუსურად გამოიყურება, ისინი იმდენს იღებდნენ თავის თავზე, რისი მეათედი კომპეტენციაც და დამსახურებაც არ ჰქონდათ. ეს იწვევდა სერიოზულ უკმაყოფილებას ე.წ. ძველ გვარდიაში“, - განაცხადა ხუხაშვილმა.

შეგახსენებთ, რომ “ქართული ოცნების“ დეპუტატმა ეკა ბესელიამ, შესაძლოა, იურიდიულ საკითხთა კომიტეტის თავმჯდომარის თანამდებობა დატოვოს და კომიტეტის თავმჯდომარის სავარძლიდან პარლამენტის სპიკერატში გადაინაცვლოს. „ინტერპრესნიუსის“ ინფორმაციით, ასეთი შეთავაზება ეკა ბესელიამ გუნდისგან უკვე მიიღო.

როგორც „ინტერპრესნიუსს“ ინფორმირებულმა წყარომ განუცხადა, პარლამენტის ხელმძღვანელობაში იურიდიულ საკითხთა კომიტეტის თავმჯდომარის პოსტზე ეკა ბესელიას შეცვლის საჭიროებას ხედავენ. არაოფიციალური ინფორმაციით, პარლამენტის ლიდერშიპში დაისვა საკითხი, რომ კომიტეტის საქმიანობას სხვამ უხელმძღვანელოს და ამ თანამდებობაზე ეკა ბესელია შეიცვალოს.

როგორც “ინტერპრესნიუსს“ განუცხადეს, კომიტეტის თავმჯდომარის პოსტის სანაცვლოდ, ბესელიამ პარლამენტის ვიცე-სპიკერის თანამდებობაზე არჩევის შეთავაზება მიიღო (უმრავლესობის კვოტით ვიცე-სპიკერის ერთი ადგილი პარლამენტში ვაკანტურია), რათა აღნიშნულ გადაწყვეტილებას მისი თანამდებობრივი დაქვეითების სახე არ მიეცეს.

ემილ ავდალიანი - ირანი და ჩინეთი 400 მილიარდი დოლარის შეთანხმებას ამზადებენ, თუ ეს მოხდა პერსპექტივაში ჩინური გავლენა ირანსა და ახლო აღმოსავლეთზე ხელშესახები გახდება
ქართული პრესის მიმოხილვა 25.09.2020
ამირან სალუქვაძე - 2020 წლის საპარლამენტო არჩევნების მთავარი ინტრიგა იქნება, ვინ გადალახავს ამ საცოდავ 1%-ს
მე-3 და მე-4 კატეგორიების საწარმოებისთვის
Samsung Galaxy S20 FE (Fan Edition) წინასწარი შეკვეთები უკვე დაიწყო
პანდემიის დროს გააქტიურებული ქართული სტარტაპი - 0% საკომისიო და უფასო მიტანა 100 დღის განმავლობაში
„კარფურის გათამაშება გრძელდება“ - წინ კიდევ უსასრულო სიურპრიზებით სავსე 2 კვირა გელოდებათ
"ლიბერთის" ახალი აქცია - #გულით პედაგოგებისთვის