არასამთავრობო ორგანიზაციების ნაწილი ჩამალული რომ არის, ალბათ, ამოვა და თვალს გაუსწორებს რეალობას და გააკეთებს იმ განცხადებას რასაც ხალხი ელოდება, - ასე გამოეხმაურა თბილისის მერი კახა კალაძე სოფელ ატოცში სალომე ზურაბიშვილის ჩასვლის დროს მომხდარ ინციდენტს. კახა კალაძის თქმით, ის მომხდარის შესახებ საერთაშორისო ორგანიზაციების განცხადებებსაც ელოდება.
„რაც მოხდა, სამარცხვინოს ვუწოდებ, სხვა - არაფერს, რა უნდა ვუწოდო? ესეც ნათელი მაგალითია თუ როგორ ხდება ხელის შეშლა მთლიანად კამპანიის დროს. გავიხსენებ, რა იყო პირველი ტურის დროს, როდესაც სალომე ზურაბიშვილი ხვდებოდა ამომრჩეველს და “ნაციონალური მოძრაობის” წევრები მიდოდნენ, იქ იყო პირადი შეურაცხყოფა, მცდელობა, რომ ჩაეშალათ ეს შეხვედრები. მე ველოდები საერთაშორისო ორგანიზაციების განცხადებებს. არასამთავრობო ორგანიზაციების ნაწილი ალბათ, ჩამალული, რომ არის, ამოვა და თვალს გაუსწორებს რეალობას და გააკეთებს იმ განცხადებას, რასაც ელოდება ხალხი”,- განაცხადა კალაძემ.
ცნობისთვის, სააკაშვილის საპრეზიდენტო ბიბლიოთეკის პიარმენეჯერმა “ქართული ოცნების” მიერ მხარდაჭერილ დამოუკიდებელ საპრეზიდენტო კანდიდატს, სალომე ზურაბიშვილს გუშინ ჰკითხა, თუ “რა ნამუსით იყო საოკუპაციო ხაზთან ჩასული და ჯერ თქვას, ომი ვისი ბრალია“, რაზეც სალომე ზურაბიშვილმა უპასუხა, რომ ის ჩავიდა, როგორც მომავალი პრეზიდენტი და „ახლა განცხადებების დრო არ არის“.