სააკაშვილის რეჟიმის პერიოდში, როცა სამართალი მართლაც ჩვენს მხარეს იყო, პოლიციელებს თავში არ ვურტყამდით, არ ვძალადობდით - მაშინ ძალადობდნენ ჩვენზე და როცა გვარბევდნენ, საპასუხო ძალადობაზეც არ გადავდიოდით, - ამის შესახებ ჟურნალისტებს “ქართული ოცნების“ დეპუტატმა ეკა ბესელიამ განუცხადა.

როგორც ბესელიამ აღნიშნა, გამოხატვის თავისუფლების კონსტიტუციური უფლება ქვეყანაში დაცული უნდა იყოს, მაგრამ მეორეს მხრივ, მოქალაქეებმა არ უნდა იძალადონ სამართალდამცველებზე, რომლებიც აქციის მონაწილეთა უსაფრთხოებას იცავენ.

“მესმოდა შედარება, როცა 2007 წლის 7 ნოემბერს დაგვარბიეს, როცა 2008 წელს დაგვარბიეს, როცა იყო საკნების აქცია რუსთაველზე - დიახ, ჩვენ ბევრი აქცია გამოვიარეთ, ბევრი საპროტესტო გამოსვლა გვქონდა და წლები ვიბრძოდით, რომ მიხეილ სააკაშვილის რეჟიმი შეცვლილიყო. მაშინ გაცილებოთ მეტი ადამიანი იდგა ქუჩაში, რაც კი ოდესმე ყოფილა. პრაქტიკულად ყველა, მინუს ერთი, სააკაშვილის რეჟიმის წინააღმდეგ იყო. იმ პერიოდში, როცა სამართალი მართლაც ჩვენს მხარეს იყო, პოლიციელებს თავში არ ვურტყამდით, არ ვძალადობდით - მაშინ ძალადობდნენ ჩვენზე“, - განაცხადა ეკა ბესელიამ.