საპარლამენტო უმცირესობის ქმედება ბოიკოტად შეიძლება შეფასდეს, - ამის შესახებ ვიცე-სპიკერმა გია ვოლსკიმ პარლამენტის პლენარულ სხდომის გახსნამდე განაცხადა.
სხდომაზე რეგისტრაცია ორჯერ ჩატარდა, თუმცა ოპოზიციის წარმომადგენლებმა რეგისტრაცია არ გაიარეს, ვინაიდან მათი თქმით, პარლამენტში, სადაც მთავარი ფინანსური დოკუმენტი გადის, უმრავლესობა საკმარისი რაოდენობით არ არის წარმოდგენილი.
„გასაგებია, პოლიტიკური დემარში გარკვეული ფორმაა, მაგრამ დღევანდელ განხილვაზე ეს ქმედება უკვე ბოიკოტად შეიძლება შეფასდეს. რაც ქვეყნისთვის არ არის კარგი“, - მიმართა გია ვოლსკიმ უმცირესობას.
შეგახსენებთ, რომ პარლამენტის პლენარული სხდომა, სადაც ფინანსთა მინისტრმა 2019 წლის ბიუჯეტის პროექტი უნდა წარადგინოს, ვერ გაიხსნა.
რეგისტრაცია ორჯერ ჩატარდა, პირველად ქვორუმი არ იყო, ხოლო განმეორებითი რეგისტრაციის დროს ტაბლოზე სხდომათა დარბაზში 78 დეპუტატის ყოფნა დაფიქსირდა, თუმცა უმცირესობის ინფორმაციით, ამ რაოდენობის დეპუტატებს რეგისტრაცია არ გაუვლია და პულტების გამოყებას ჰქონდა ადგილი.
პლენარული სხდომა 16:00 საათამდე გადაიდო.