როგორ აძლევთ საკუთარ თავს უფლებას, რომ მასშტაბური წარმომადგენლობითი ხარჯი გასწიოთ, როცა იცით, რომ ბავშვები უკიდურეს სიღარიბეში ცხოვრობენ და პენსიონერები ვერ ყიდულობენ წამლებს, - ამ კითხვით მიმართა „ევროპული საქართველოს“ წევრმა ირმა ნადირაშვილმა ფინანსთა მინისტრ ვანო მაჭავარიანს პარლამენტის პლენარულ სხდომაზე.
ნადირაშვილმა ფინანსთა მინისტრს „საერთაშორისო გამჭვირვალობა - საქართველოს“ კვლევა გაახსენა, რომლის თანახმად, ხელისუფლებამ 2017 წელს 12 მილიონის წარმომადგენლობითი ხარჯი გასწია.
„მინდა გავიხსენო „საერთაშორისო გამჭვირვალობა - საქართველოს“ ერთი კვლევა, სადაც ნათქვამია, რომ წარმომადგენლობითი ხარჯები იზრდება მუდმივად. კვლევაში ასევე ნათქვამია, რომ 2017 წელს ეს ხარჯები იყო ყველაზე დიდი და მიაღწია 12 მილიონს. შემდეგ დათვალეს და ამ ორგანიზაციამ გვითხრა, რომ მთავრობა წარმომადგენლობითი ხარჯებისთვის დღეში 27 ათას ლარს ხარჯავს. ბატონო მინისტრო, სხვა კვლევაც არსებობს. მაგალითად, ის, რომ 40 ათასი ბავშვი უკიდურეს სიღარიბეში ცხოვრობს. მე მაინტერესებს, როგორ აძლევთ საკუთარ თავს უფლებას, რომ ასეთი მასშტაბის წარმომადგენლობითი ხარჯი გასწიოთ, როცა იცით, რომ ასეთი მონაცემებია, ბავშვები უკიდურეს სიღარიბეში ცხოვრობენ, პენსიონერები ვერ ყიდულობენ წამლებს. როგორ აძლევთ თქვენ თავს უფლებას, რომ ასეთი მასშტაბის ხარჯები გაიღოთ?!“, - მიმართა ნადირაშვილმა ფინანსთა მინისტრს.