საქართველო დადებითად იცვლის თავის პოლიტიკურ იდენტობას ასოცირების ხელშეკრულებაზე ხელმოწერის შემდეგ, - ამის შესახებ ევროპარლამენტის წევრმა, საქართველოს მიერ ასოცირების შეთანხმების შესრულების შესახებ ანგარიშის მომხსენებელმა ანდრეის მამიკინსმა განაცხადა.

შეგახსენებთ, რომ დღეს ევროპარლამენტმა პლენარულ სესიაზე საქართველოს მიერ ასოცირების შეთანხმების შესრულების შესახებ რეზოლუცია 528 ხმით მიიღო. წინააღმდეგ 97 ევროპარლამენტარი წავიდა, ხოლო 34-მა თავი შეიკავა.

„მიუხედავად იმ გამოწვევებისა, რომელიც უკავშირდება კორუფციას და შრომით უფლებებს, საქართველომ მკაფიო ნაბიჯები გადადგა მმართველობის ევროპული მოდელისკენ და სამინისტროების სტრუქტურული რეფორმები კარგ შედეგებს გვპირდება. ასევე, მოხარული ვარ იმით, რომ ადამიანის უფლებების საკითხებს მნიშვნელოვანი ადგილი უკავია პოლიტიკურ დღის წესრიგში. ევროკავშირი, მათ შორის ევროპარლამენტი განაგრძობს თავიანთ ჩართულობას და საქართველოს მხარდაჭერას ამბიციური რეფორმების გზაზე“, - დასძინა ევროპარლამენტარმა.