თბილისი.14 ნოემბერი. ”ინტერპრესნიუსი” - ცენტრალურმა საარჩევნო კომისიამ ნამდვილად იმუშავა დემოკრატიული პრინციპების დაცვით, გამჭვირვალედ და ეს გამოჩნდა არჩევნების პირველ ტურში, ასე გავაგრძელებთ, - ასე უპასუხა ცენტრალური საარჩევნო კომისიის თავმჯდომარე თამარ ჟვანიამ კომისიის სხდომაზე "სამოქალაქო განვითარების საერთაშორისო ქსელის წარმომადგენელს" შმაგი ჩოხელს, რომელმაც ცესკო მიკერძოებაში დაადანაშაულა.
არასამთავრობო ორგანიზაციის წარმომადგენლის განცხადებით, ცესკო ხელისუფლების სასარგებლო გადაწყვეტილებებს იღებს. ამაზე თამარ ჟვანიამ განაცხადა, რომ საარჩევნო კომისიის მუშაობა დადებითად არის შეფასებული ნეიტრალური საერთაშორისო ორგანიზაციების მხრიდან.
სხდომა ცენტრალურ საარჩევნო კომისიაში ერთი საათია მიმდინარეობს. 9 განსახილველ საკითხს შორის არის საპრეზიდენტო არჩევნების მეორე ტურის თარიღის დანიშვნაც. სხდომას კომისიის წევრებისა და არასამთავრობო სექტორის წარმომადგენელთა გარდა, გაერთიანება "ძალა ერთობაშიას" წარმომადგენლებიც ესწრებიან, რომლებიც არჩევნების არასამუშაო დღეს ჩატარებას ითხოვენ.