„ბიბლუსი გალერეაში“ უნიკალური ანთოლოგიის „ქართული ანბანი - 33 ემოცია“ წარდგენა გაიმართება

მაღაზია „ბიბლუსი გალერეაში“ 15 ნოემბერს, ორენოვანი ანთოლოგიის, „ქართული ანბანი - 33 ემოცია“ პრეზენტაცია გაიმართება, რომელიც ქართულ-ამერიკული უნივერსიტეტისა (GAU) და გამომცემლობა „პალიტრა L“ თანამშრომლობით მომზადდა.

როგორც „ბიბლუსის“ ინფორმაციაშია აღნიშნული, კრებული „ქართული ანბანი - 33 ემოცია“ 33 თანამედროვე ქართველი ავტორის ტექსტს აერთიანებს.

“წიგნი რუსუდან ფეტვიაშვილის ნამუშევრებითაა გაფორმებული. საზედაო ასოები საგანგებოდ ანთოლოგიისთვის დაიხატა და თან ერთვის თითოეული ავტორის ჩანაწერს. მწერლები და პოეტები კი მათთვის განკუთვნილ ასო-ბგერაზე იწყებენ პირველი ფრაზის პირველ სიტყვას და საკუთარ დამოკიდებულებას ქართული ანბანის, ენის მიმართ გამოხატავენ.

წიგნს წარადგენენ ეკატერინე ტოგონიძე, რომელიც პროექტის ავტორი და ხელმძღვანელი, პროზაიკოსი, ქართულ-ამერიკული უნივერსიტეტის (GAU) საზოგადოებასთან ურთიერთობის ხელმძღვანელია. ასევე, მაია ალუდაური - პალიტრა L-ის მთავარი რედაქტორი და კრებულის ავტორები.

ანთოლოგიის პირველი პრეზენტაცია 2018 წლის ოქტომბერში, ფრანკფურტის წიგნის ბაზრობაზე გაიმართა, სადაც საქართველო ოფიციალური სტუმარი ქვეყნის სტატუსით იყო წარმოდგენილი. 2019 წელს წიგნის წარდგინება საქართველოს სხვადასხვა ქალაქში იგეგმება.

წიგნი უპრეცედენტოა და ეხმიანება იუნესკოს (2015 წლის) გადაწყვეტილებას, რომლის მიხედვითაც „უძველესი ქართული ანბანის სამი სახეობის ცოცხალ კულტურას“ არამატერიალური მემკვიდრეობის ეროვნული ძეგლის სტატუსი მიენიჭა. კრებული ხელს უწყობს ქართული ანბანისა და დამწერლობის სამივე სახეობის პოპულარიზაციას. წიგნის ავტორები არიან დათო ტურაშვილი, ლია სტურუა, ლაშა ბუღაძე, დიანა ანფიმიადი, გურამ დოჩანაშვილი, ქეთი ნიჟარაძე, ხათუნა თავდგირიძე, გიორგი კეკელიძე, ლია ლიქოკელი, გურამ ოდიშარია, მაია სარიშვილი, ვახტანგ ჯავახაძე, ნინო ხარატიშვილი, ანა კორძაია-სამადაშვილი, ნანა ექვთიმიშვილი, ოთარ ჯირკვალიშვილი, როსტომ ჩხეიძე, რატი ამაღლობელი, ტარიელ ჭანტურია, ბექა ქურხული, ეთერ თათარაიძე, პაატა შამუგია, სალომე ბენიძე, არჩილ ქიქოძე, ეკატერინე ტოგონიძე, მიხეილ ანთაძე, კოტე ჯანდიერი, ნოდარ მამაცაშვილი, გიორგი არაბული, გაგა ნახუცრიშვილი, აკა მორჩილაძე, თეონა დოლენჯაშვილი, ბესიკ ხარანაული. რაც შეეხება მთარგმნელებს, ისინი არიან ნანუკა კობახიძე, ერიკ თეოფან ჰალვორსონი“, - ნათქვამია ინფორმაციაში.

რამაზ საყვარელიძე - ქართულ პოლიტიკაში უშინაარსობა უნდა დამთავრდეს, თორემ ერთფეროვნებაში, როცა არც პურია და არც სანახაობა, კიდევ უფრო გაიზრდება პოლიტიკური ნიჰილიზმი
ქართული პრესის მიმოხილვა 21.09.2019
„სოფლად ცხოვრება, როგორც ტურისტული პროდუქტი” - რა იგეგმება ბათუმში 20-21 სექტემბერს?
გერმანიის ფრეზენიუსის ინსტიტუტის ლაბორატორიის  დასკვნით მარნეულის სასურსათო ქარხნის წარმოების ტრადიციულ წითელ ტყემალში სუდანის ჯგუფის საღებავები არ აღმოჩნდა (R)
„ვისოლმა“ თვითმომსახურების პირველი ავტოგასამართი სადგური გახსნა
"ჩიპოლინო" – ევროპული საბავშვო აქსესუარები "ავერსის" ქსელში
დღეიდან, ლიბერთის ბარათით Apple Pay-ს საშუალებით გადახდისას ლიბერთის მომხმარებელი 5%-იან ქეშბექს მიიღებს
"ბაზისბანკის" შვილობილი კომპანია „ბი ეიჩ ელ ლიზინგი’’ მომხმარებელს ბაზარზე საუკეთესო პირობებს სთავაზობს