თინა ბოკუჩავა - კახა კალაძეს მოვუწოდებ, გაერკვეს ჰააგაში რა პროცესებზეა საუბარი და დაუყოვნებლივ გადააყენონ თეა წულუკიანი

მე ვურჩევდი კახა კალაძეს, რომ საერთოდ, გაერკვეს რა სასამართლოზე და რა პროცესზეა საუბარი, - ასე გამოეხმაურა „ნაციონალური მოძრაობის" წევრი თინა ბოკუჩავა „ქართული ოცნების" გენერალური მდივნის კახა კალაძის მიერ გაკეთებულ განცხადებას, რომელმაც "ნაციონალური მოძრაობა" სიცრუეში დაადანაშაულა.

თინა ბოკუჩავას თქმით, კახა კალაძემ ეტყობა არ იცის, რომ ჰააგის სასამართლოს შეუძლია დაუყოვნებლივ გამოსცეს დაკავების ორდერები კონკრეტულ პირებზე.

"ეს არ არის სასამართლო, რომელიც განიხილავს სახელმწიფოებს შორის დავებს. ეს არის სასამართლო, რომელსაც სისხლის სამართლის პასუხისმგებლობაში შეუძლია მისცეს კონკრეტული პირები, მათ შორის, სამხედროები. ასე, რომ მე მოვუწოდებდი ამ ადამიანს, გაერკვეს რა სასამართლოზე და რა პროცესებზეა საუბარი. მან მიიღოს მონაწილეობა „ქართული ოცნების" პოლიტიკურ გადაწყვეტილებაში და დაუყოვნებლივ გადააყენონ თეა წულუკიანი,რომელიც პირადად არის პასუხისმგებელი იმაზე, რომ დღეს საქართველო და სამხედროები ამ საშიშროების წინაშე დგანან“, -განაცხადა ბოკუჩავამ.

თბილისის მერის, კახა კალაძის განცხადებით, „ნაციონალურმა მოძრაობამ“ გადაწყვიტა, დარტყმა მიაყენოს საქართველოს შეიარაღებულ ძალებს და მის ერთიანობას, „რადგან ავრცელებენ ცრუ ინფორმაციას, თითქოს 2008 წლის რუსეთ-საქართველოს ომში მონაწილე ქართველ სამხედრო მოსამსახურეებს ემუქრებათ ჰააგაში გასამართლების საფრთხე“. კახა კალაძის განცხადებით, ეს სიცრუე მოიგონეს მათ, ვინც დანაშაული ჩაიდინა საქართველოს ისტორიისა და მისი მომავლის წინაშე.