გაერთიანებული ოპოზიციის „ძალა ერთობაშიას“ წევრის გიორგი ვაშაძის ინფორმაციით, იუსტიციის სამინისტრო მსჯავრდებულებისთვის პირადობის მოწმობებს მასიურად ბეჭდავს, რომლის ერთ-ერთი მიზანიც ის არის, რომ ამ ადამიანებმა საპრეზიდენტო არჩევნების მეორე ტურში ხმა ხელისუფლებისთვის სასურველ კანდიდატს მისცენ. როგორც ვაშაძემ პრესკონფერენციაზე განაცხადა, „ქართულ ოცნებას“ არჩევნების გაყალბების საშუალება არ მიეცემა.
„მიზანი არის მარტივი, აიძულონ ეს ხალხი მივიდნენ საარჩევნო ყუთებთან ან ხმა მისცენ მათ სასურველ კანდიდატს ან თუ არ მივლენ, მათი ხმები გააუქმონ, ეს არის ძალიან კონკრეტული მიზანი, რაც „ქართულ ოცნებას“ აქვს. სამწუხაროდ, ციხეში არ მოქმედებს არჩევნები ოთხშაბათს იქნება, თუ კვირას, უცხოეთში არსებული ჩვენი უბნებისგან განსხვავებით. ეს არის არჩევნების გაყალბების და არჩევნებით მანიპულაციის კიდევ ერთი მცდელობა „ქართული ოცნების“ მხრიდან. ეს ვერ გაუვათ, ეს არ უშველით!“ - განაცხადა გიორგი ვაშაძემ.