საბავშვო იუმორისტული ტელჟურნალ „ერალაშის“ სამხატვრო ხელმძღვანელი ბორის გრაჩევსკი მისი, რეჟისორ ალექსანდრ შეინისა და პროდიუსერ ვლადიმერ პიროჟკას საქართველოში არშეშვების ფაქტს ეხმაურება.
„დღეს თბილისში უნდა გახსნილიყო ფესტივალი „პაემანი რუსეთთან“. ქვეყანაში იმის გამო არ შეგვიშვეს, რომ აფხაზეთში ვიყავით ნამყოფი. თავაზიანად გამოგვაცილეს და თვითმფრინავში ჩაგვსვეს. მე უკვე მოსკოვში ვარ. რა თქმა უნდა საწყენია. არასოდეს ვყოფილვარ საქართველოში. ჩვენ ისე ვემზადებოდით და ბევრი საინტერესო რამ მოვამზადეთ“, - განუცხადა „რია ნოვოსტის“ გრაჩევსკიმ.
მისი თქმით, ფესტივალის წარმომადგენლები, ვინაიდან საქართველოში რუსეთის საელჩო არ არსებობს, შვეიცარიის საელჩოს დაუკავშირდნენ, ჰქონდათ მოლაპარაკება, მაგრამ საქართველოს შინაგან საქმეთა მინისტრი ურყევი იყო. „დაიკარგა დრო, არ არის ჩემოდნები, მოძებნიან. მთელი ისტორიაა“, - განაცხადა გრაჩევსკიმ.
დღეს საქართველოს შინაგან საქმეთა მინისტრმა გიორგი გახარიამ განაცხადა, რომ რუს კინემატოგრაფისტებს, რომლებსაც დღეს საქართველოში შემოსვლაზე უარი ეთქვათ, დარღვეული აქვთ „ოკუპირებული ტერიტორიების შესახებ“ კანონი.
შინაგან საქმეთა სამინისტრომ რუსეთის ფედერაციის სამ მოქალაქეს საქართველოში შემოსვლაზე უარი უთხრა. აღნიშნული პირები რუსეთის იმ დელეგაციის წევრები არიან, რომლებსაც კინემატოგრაფიულ ფესტივალში „პაემანი რუსეთთან“ უნდა მიეღოთ მონაწილეობა. როგორც „ინტერპრესნიუსს“ შსს-ში განუცხადეს, ისინი საქართველოში დღეს მოსკოვი-თბილისის რეისით ჩამოფრინდნენ.