საქართველოს ვიცე-პრემიერი, რეგიონული განვითარებისა და ინფრასტრუქტურის მინისტრი მაია ცქიტიშვილი, ოზურგეთის მაჟორიტარ დეპუტატ არჩილ თალაკვაძესთან, მხარის გუბერნატორ ზურაბ ნასარაიასთან და ადგილობრივი თვითმმართველობის სხვა წარმომადგენლებთან ერთად, ოზურგეთის მუნიციპალიტეტის სოფელ ბახვში მოსახლეობას შეხვდა და გურიის რეგიონში 2019 წელს დაგეგმილი ინფრასტრუქტურული პროექტები გააცნო.

როგორც „ინტერპრესნიუსს“ რეგიონული განვითარების და ინფრასტრუქტურის სამინისტროდან აცნობეს, შეხვედრას ოზურგეთის მუნიციპალიტეტის სამი სოფლის - ბახვის, ცხემლისხიდის და ვაკიჯვარის მოსახლეობა ესწრებოდა, რომლებმაც ხელისუფლების წარმომადგენლებს თავიანთი სოფლების საჭიროებების შესახებ ინფორმაცია მიაწოდეს.

უწყების ცნობით, სამივე სოფლის შემთხვევაში, პრიორიტეტია წყალმომარაგების სისტემის გამართვა, სოფლის შიდა და სოფლების ერთმანეთთან დამაკავშირებელი გზების რეაბილიტაცია-მშენებლობა, გარე-განათებების დამონტაჟება და სხვა.

ვიცე-პრემიერმა, მოისმინა მოსახლეობის საჭიროებები, უპასუხა კითხვებს და გურიის მხარეში დაგეგმილ სხვა ინფრასტრუქტურულ პროექტებთან ერთად, გააცნო მათ ოზურგეთის მუნიციპალიტის სამ სოფელში დაგეგმილი მასშტაბური წყალმომარგების პროექტი.

„ბევრი წლის განმავლობაში სოფლების - ბახვის, ცხემლისხიდის და ვაკიჯვრის მოსახლეობა ითხოვდა წყალმომარაგების სისტემის მოწესრიგებას. უშუალოდ თვითმმართველობასთან, გუბერნიასთან, მაჟორიტარ დეპუტატთან კომუნიკაციით მოვახერხეთ წყალმომარაგების კომპანიაში გამოგვეძებნა რესურსი ამ პროექტისთვის. 9 მილიონ ლარზე მეტი ინვესტიცია იქნება საჭირო იმისთვის, რომ 7000-ზე მეტი ადამიანის წყალმომარაგება მოწესრიგდეს. ამ სოფლებში წყალმომარაგების სისტემა, სამწუხაროდ, საერთოდ არ არის და უკვე 1 წელიწადში გვექნება საშუალება 24 საათიანი სასმელი წყალი მივაწოდოთ მოსახლეობას“, - აღნიშნა ვიცე-პრემიერმა.

რეგიონული განვითარებისა და ინფრასტრუქტურის მინისტრის მოადგილე გიგა კაციას თქმით, პროექტის სამშენებლო სამუშაოების 2019 წლის აპრილში დაიწყება და მოიცავს სრული ციკლის სამუშაოების განხორციელებას, სოფელ ვაკიჯვარში წყლის რეზერვუარით. მან ასევე აღნიშნა, რომ წყლის ხარისხი შემოწმებულია და არის მაღალი. სამუშაოებში მაქსიმალურად იქნება ჩართული ადგილობრივი მოსახლეობა.

მაია ცქიტიშვილმა ისაუბრა გურიის რეგიონში დაგეგმილ სხვა ინფრასტრუქტურულ პროექტებზეც.