საქართველოს პრემიერ-მინისტრმა არჩეული პრეზიდენტის ინაუგურაციის საორგანიზაციო კომისიის შექმნის შესახებ განკარგულება გამოსცა.
საორგანიზაციო კომისიას მთავრობის ადმინისტრაციის უფროსი კახა კახიშვილი უხელმძღვანელებს, შემადგენლობა კი 30 პირითაა განსაზღვრული.
პრემიერის განკარგულების მიხედვით, კომისიამ უნდა შეიმუშავოს ახალარჩეული პრეზიდენტის ფიცის დადების ცერემონიალის სამოქმედო გეგმა და დასამტკიცებლად მთავრობას წარუდგინოს.
პრემიერი კომისიას ცერემონიის ორგანიზების მიმართულებით კონკრეტულ დავალებებსაც აძლევს. როგორც პრემიერის დადგენილებაშია აღნიშნული, მოქმედი პრეზიდენტის ადმინისტრაციას ეთხოვა, რომ ინაუგურაციის მოსამზადებელი კომისიის მუშაობაში პროტოკოლის სამსახურის წარმომადგენელი ჩაერთოს. „ეთხოვოს პრეზიდენტის ადმინისტრაციას, კომისიის მუშაობაში მონაწილეობის მისაღებად საქართველოს მთავრობის ადმინისტრაციას წარუდგინოს პრეზიდენტის ადმინისტრაციის პროტოკოლის დეპარტამენტის წარმომადგენლის კანდიდატურა“, - ნათქვამია პრემიერის დადგენილებაში.
განკარგულება ვრცლად იხილეთ ბმულზე.