ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის, დავით სერგეენკოს განცხადებით, სოციალურად დაუცველი ბავშვებისთვის გადასაცემ 50-ლარიან დახმარებასთან დაკავშირებით საბოლოო კონსულტაციები პრემიერ-მინისტრ მამუკა ბახტაძესთან გაიმართება.

როგორც დავით სერგეენკომ განაცხადა, დახმარების პროგრამა, შესაძლოა, დასაწყისში სრულად ფულადი იყოს ან ნაწილმა ვაუჩერული სახე მიიღოს.

„ჩვენ ამ პროგრამის რამდენიმე ვარიანტი გვაქვს. შეიძლება, წავიდეთ იმ ვერსიით, რომ დასაწყისში მთლიანად მონეტარული იყოს ან მის ნაწილი იყოს ვაუჩერული. ამაზე პრემიერთან უახლოეს მომავალში გვექნება საბოლოო კონსულტაციები ერთად და საბოლოო ფორმატზე ჩამოვყალიბდებით, რადგან დრო ძალიან ცოტა დარჩა, 1-ელი იანვრიდან უნდა დავიწყოთ ამ პროგრამის განხორციელება“, - აღნიშნა მან.