ვენესუელას პრეზიდენტის ნიკოლას მადუროს განცხადებით, აშშ-ს ხელისუფლება ქვეყანაში სახელმწიფო გადატრიალებას ამზადებს.

„დღეს თეთრი სახლი კოორდინირებას უწევს მცდელობას გაანადგუროს დემოკრატიული ცხოვრება ვენესუელაში და გადატრიალება მოახდინოს დემოკრატიული, თავისუფალი და კონსტიტუციური რეჟიმის წინააღმდეგ“, - განაცხადა ვენესუელას პრეზიდენტმა.

ნიკოლას მადუროს თქმით, ის უახლოეს დროში პრესკონფერენციას გამართავს, სადაც აღნიშნული შეთქმულების შესახებ დეტალებს გაასაჯაროებს.

შეგახსენებთ, რომ მიმდინარე წლის სექტემბერში გამოცემა The New York Times-მა ინფორმაცია გაავრცელა, რომ დონალდ ტრამპის ადმინისტრაციის წარმომადგენლებმა საიდუმლო შეხვედრა გამართეს ვენესუელელ აჯანყებულებთან, სადაც მადუროს დამხობის შესაძლებლობას განიხილავდნენ.

ვენესუელა ბოლო წლებში ყველაზე მწვავე სოციალურ-ეკონომიკურ კრიზისს განიცდის. ადგილი აქვს ჰიპერინფლაციასა და ეროვნული ვალუტის დევალვაციას. მიმდინარე წლის იანვრიდან ოქტომბრის ჩათვლით ინფლაციამ 287 ათასი პროცენტი შეადგინა.