ჯანდაცვის კომიტეტის თავმჯდომარის მოადგილე ლევან კობერიძე მმართველ გუნდს მიმართავს, განახლდეს მუშაობა ნარკოპოლიტიკის ლიბერალიზაციასთან დაკავშირებით ინიცირებულ საკანონმდებლო პაკეტზე და დაწყებული პროცესი ბოლომდე მივიდეს.

როგორც კობერიძემ ჯანდაცვის კომიტეტის სხდომაზე განაცხადა, გაიმართა აქტიური განხილვები პარლამენტში, უწყებათაშორისი კომისიის ფარგლებში, შეთანხმებისა და შეჯერების პროცესი კი გაიწელა.

კობერიძის შეფასებით, პარლამენტში ინიცირებული საკანონმდებლო პაკეტი მოიცავს ისეთ მნიშვნელოვან საკითხებს, როგორიცაა ცხოვრების ჯანსაღი წესი, პრევენცია, სიკვდილიანობის თავიდან აცილება და საჭიროა მისი დროულად მიღება.

ლევან კობერიძის პოზიცია გაიზიარა კომიტეტის თავმჯდომარემ აკაკი ზოიძემ.

საკანონმდებლო პაკეტი, რომელიც ნარკოპოლიტიკის ლიბერალიზაციას ითვალისწინებს, პარლამენტს გასული წლის გაზაფხულზე წარედგინა. საკითხი ამ ეტაპზე პირველი მოსმენით იურიდიული კომიტეტის ფარგლებშია გაჩერებული და განხილვა რამდენჯერმე გადაიდო.