სახელმწიფო აუდიტის სამსახურს 4-დან 3 ექიმის მიმართ, რომლებმაც სალომე ზურაბიშვილის სასარგებლოდ წინასაარჩევნო პერიოდში შემოწირულება განახორციელეს, კითხვები აღარ აქვს.

როგორც „ინტერპრესნიუსს“ სახელმწიფო აუდიტის სამსახურში განუცხადეს, 3-მა ექიმმა წარმოადგინა შემოსავლების დამადასტურებელი ინფორმაცია, ხოლო 1-ის მოწვევა იგეგმება ალტერნატიული მისამართების გამოყენებით.

„სახელმწიფო აუდიტის სამსახურის პოლიტიკური პარტიების ფინანსური მონიტორინგის სამსახურმა შეისწავლა „ჩაჩავას კლინიკისა“ და „ღუდუშაურის სახელობის ეროვნული სამედიცინო ცენტრის“ თანამშრომლების მიერ ოქტომბრის დასაწყისში დამოუკიდებელი კანდიდატის სალომე ზურაბიშვილის სასარგებლოდ განხორციელებული შემოწირულებები. აღნიშნულთან დაკავშირებით, სასამართლოს თანხმობის საფუძველზე, შესაბამისი ინფორმაცია გამოთხოვილ იქნა შემოსავლების სამსახურიდან და საბანკო დაწესებულებებიდან. მიღებული მონაცემების ანალიზის შედეგად სამსახურმა გასაუბრებაზე მიიწვია 4 ფიზიკური პირი, რომელთაგან 3-მა ფიზიკურმა პირმა წარმოადგინა შემოსავლების დამადასტურებელი ინფორმაცია, ხოლო 1 ფიზიკური პირის მოწვევა იგეგმება ალტერნატიული მისამართების გამოყენებით“, - განაცხადეს უწყებაში.

ექიმებმა სალომე ზურაბიშვილს სოლიდური თანხები შესწირეს, რამაც ოპოზიციასა და საზოგადოების ნაწილში კითხვები გამოიწვია.