მიხეილ სააკაშვილმა თავის უკომპრომისო გეგმებზე საუბრით სერიოზულად შეარყია “ნაციონალური მოძრაობისა“ და ზოგადად ოპოზიციის რენომე და ავტორიტეტი საერთაშორისო დონეზე, - ამის შესახებ ჟურნალისტებს პარლამენტის ვიცე-სპიკერმა გია ვოლსკიმ განუცხადა.

ვოლსკის შეფასებით, მნიშვნელოვნად განელდა ინტერესი როგორც სააკაშვილის პიროვნების, ასევე პარტია “ნაციონალური მოძრაობის“ მიმართ.

“მიხეილ სააკაშვილის გამოხტომები, განცხადებები, შეძახილები არის სწორედ ის ფაქტორი, რომელმაც პარტიას, როგორც პოლიტიკურ ძალას, საერთაშორისო დონეზე საკმაოდ სერიოზული დარტყმა მიაყენა. ვფიქრობ, ეს ტენდენცია გაგრძელდება, რადგან მიხეილ სააკაშვილი საკუთარ პოზიციას არ შეიცვლის. მისი გამონათქვამები არის ანტისახელმწიფოებრივი, ხალხისა და საზოგადოების წინააღმდეგ მიმართული და თავადაც კარგად იცის, რომ ამის რეალიზაცია საქართველოში შეუძლებელია - დესტაბილიცაზია არის სააკაშვილის მთავარი ლოზუნგი, რისკენაც ის მოუწოდებს“, - განაცხადა გია ვოლსკიმ.