სასოფლო-სამეურნეო მიწების უცხოელებზე გასხვისების საკითხზე მორატორიუმის დაწესების მოთხოვნით იუსტიციის სახლთან მიმდინარე აქციის ერთ-ერთი მონაწილის, ზვიად ტომარაძის ინფორმაციით, ცოტა ხნის წინ სამართალდამცველებმა დაკითხვაზე აქციის კიდევ ერთი მონაწილე გურამ ფალავანდიშვილი წაიყვანეს.
როგორც ტომარაძემ აქციაზე განაცხადა, პოლიციამ აქციის მონაწილეებს განუმარტა, რომ გამოკითხვის დასრულების შემდეგ ფალავანდიშვილი აქციას დაუბრუნდება.
"იმედი მაქვს, როგორც შსს-ს, ასევე ხელისუფლების სხვა ორგანოებს ეყოფა კეთილგონიერება და ამ საკითხს სრული სერიოზულობით მოეკიდება. გააანალიზებს და არ დაუშვებს იმას, რომ რაიმე სამართლებრივი პრობლემა შეექმნას ხალხს, რომელიც იცავს ქართულ მიწას", - განაცხადა ტომარაძემ.
სასოფლო-სამეურნეო მიწების უცხოელებზე გასხვისების საკითხზე მორატორიუმის დაწესების მოთხოვნით იუსტიციის სახლთან აქცია მეორე დღეა მიმდინარეობს.