მიმაჩნია, რომ ეს გადაწყვეტილება სწორია, – ამგვარად გამოეხმაურა „პატრიოტთა ალიანსის“ წევრი ადა მარშანია პრეზიდენტის ადმინისტრაციაში მოსალოდნელ შემცირებებს.

მისი თქმით, საკითხი სიღრმისუელ განხილვას საჭიროებს და ამ ეტაპზე დეტალურად ვერ ისაუბრებს, თუმცა თვლის, რომ პრეზიდენტმა თავად უნდა გადაწყვიტოს ვინ იმუშავებს მასთან.

„პირველ რიგში, ეს კანონპროქტი უნდა განვიხილოთ, ასე ხელაღებით, რომ არ გიპასუხოთ, ჩავიხედოთ კანონპროექტში, განვიხილოთ სერიოზულად და მერე უკვე კვალიფიციურად გაგცემთ პასუხს. ისე ზოგადად, შემიძლია ვთქვა, რომ პრეზიდენტი თავისი აპარატის მიმართულებაში უნდა იყოს მაქსიმალურად თავისუფალი, რადგან ისეთი აპარატი ჰყავდეს, რომელიც ეფექტურად იმუშავებს და ვინ თუ არა მან, პირველ რიგში უნდა გადაწყვიტოს, რომელი ადამიანი იმუშავებს მასთან. რასაკვირეველია, უნდა ვიფიქროთ ამ ადამიანების უფლებების დაცვაზე,“ – განაცხადა ადა მარშანიამ.

როგორც ცნობილია, პრეზიდენტის ადმინისტრაციისთვის კატეგორიულად მიუღებელია კანონში დაგეგმილი ცვლილებები, რომლის მიხედვით, პრეზიდენტის ადმინისტრაციის თანამშრომლები ადმინისტრაციული ხელშეკრულების საფუძველზე დასაქმებული პირები უნდა გახდნენ.

როგორც პრეზიდენტის საპარლამენტო მდივანი ანა ნაცვლიშვილი განმარტავს, აღნიშნული ცვლილებები იმას ნიშნავს, რომ თანამშრომლებს, რომლებიც მრავალი წელია პრეზიდენტის ადმინისტრაციაში მუშაობენ და უზარმაზარი გამოცდილება გააჩნიათ, აღარ ექნებათ დაცულობის ის გარანტიები, რაც საჯარო მოხელეებს აქვთ და მათ სამსახურიდან ნებისმიერ დროს, კომპენსაციისა და ახსნა-განმარტების გარეშე გაუშვებენ.