იუსტიციის სახლის შესასვლელთან აქციის მონაწილეები პრეზიდენტის ინაუგურაციამდე სასოფლო-სამეურნეო დანიშნულების მიწების უცხოელებზე გასხვისების აკრძალვას ითხოვენ. აქციაზე "პატრიოტთა ალიანსის" წარმოადგენელები, დეკანოზი დავით ისაკაძე და სხვა სასულიერო პირები, მოქალაქეები იმყოფებიან.
იუსტიციის სახლის შესასვლელს პოლიციის კორდონი იცავს და მოქალაქეები, იუსტიციის სახლში დაუბრკოლებლად შედიან.
როგორც „ინტერპრესნიუსს“ „პატრიოტთა ალიანსის“ წარმომადგენელმა ირმა ცხორაგაულმა განუცხადა, პარლამენტში დღეს სასიცოცხლოდ მნიშვნელოვანი საკითხი იხილება, რაც სასოფლო-სამეურნეო დანიშნულების მიწების უცხოელებზე გასხვისების საკითხს უკავშირდება. მისივე თქმით, დიდი ხანია „პატრიოტთა ალიანსი“ ითხოვს, აღნიშნული საკითხი კონსტიტუციაში ასახულიყო. კერძოდ, კონსტიტუციაში ჩაწერილიყო, რომ უცხოელებზე ქართული მიწები არ გაყიდულიყო და ასევე, შექმნილიყო ორგანული კანონი, რომელიც ამ საკითხს დაარეგულირებდა.
"ირაკლი კობახიძე გვარწმუნებს, რომ ორ დღეს გადამწყვეტი მნიშვნელობა არ აქვს. ინაუგურაციამდე, სწორედ ამ ორ დღეში მოხდება ძალიან ბევრი მიწის გასხვისება. ჩვენ არ გვაქვს იმის ფუფუნება, რომ დავკარგოთ და გავფლანგოთ ქართული მიწის თუნდაც ერთი გოჯი", - განაცხადა ირმა ცხორაგაულმა.